Atuisartut erngup nukissiorfiliorneq akilersulerpaat
Sisimiuni najugalinnut Nukissiorfinnut akiliut qaffappoq, tamanna erngup nukinganik innaallagissiorfiup ingerlanneqarnerata akilerneqarnissaanik pissuteqartoq, Attaveqarnermut naalakkersuisoq Jens B Frederiksen oqarpoq.
- Misissuisoqareernerani Hermann Berthelsenip oqaasii ilumoortut ilisimatinneqarpunga, taamaammat borgmesterip eqqumiilliornera paasilluarsinnaavara. Kisianni ingerlatsinermut aningaasartuutit amerlassusai tunngavigalugu akigititat taama isikkoqarput, Jens B. Frederiksen oqarpoq.
Namminersornerullutik Oqartussani Nukissiorfimmilu atorfilittat Sisimiut Kommunianut januaarimi 2007-imi e-mailikkut allapput, innaallagiaq 2005-imi tunisarineqarsimasoq najoqqutaralugu erngup nukinganik nukissiorfik atuutilerpat kilowatt tiimimut akiliut 1 koruuni 65 øri innuttaasunit akiliutigineqartartussatut naatsorsuutigineqartoq.
Naliginnaasumik uuliamut akigitinneqartumut 2 koruuni 31 øremut sanilliullugu.
Qeqqata Kommuniani Borgmesteri Hermann Berthelsen isumaqarpoq, taamani Namminersornerullutik Oqartussat Nukissiorfiillu neriorsuutigisimasaannit akinik nikingatitsineq naalakkersuisunit nassuiaavigineqartariaqartoq.
Aamma oqaatigaa Sisimiuni siorna apriilimi erngup nukinganik nukissiorfittaarneq innuttaasunut iluaqutaasussaagaluartoq, innuttaasut innaallagissamut akiliinerusalernerannik kinguneqartoq.
Februaarip aallaqqaataa aallarnerfigalugu Sisimiuni najugallit innaallagissamik atuinerminnut kilowatt tiimimut 1koruunimik akiliinerusalissapput.
- Naalakkersuisut Qeqqata Kommunianut iliuusaat maanna 3.millioninik naleqarput.
Ilaqutariit 10.000 koruuninik ukiumut akiliisarsimagunik aamma innaallagissamut akiliutissaat saniatigut 5.000 koruunimik amerlissapput, Hermann Berthelsen oqarpoq.
