Kulturimut ataatsimiititaliaq: KNR siammasinnerusumik aallakaatitsisalerli
Attaveqarneq pitsaasoq qulakkeerneqarsinnaaqqullugu Atuisartut siunnersuisoqatigiiffiat 2014-mi pilersinneqarnikuugaluarpoq.
Taannali siunertamisut atorneqanngimmat atorunnaarsinneqartussanngorpoq. Taarsiullugu atuisartut oqallittarfiisigut innuttaasut toqqaannarnerusumik isummaminnik apuussisinnaalissapput tusarniaanermilu qisuariarasuarsinnaalissallutik:
- Atuisut sinerissamiittut suleqatigineqarnerulernissaat taakkulu peqatigalugit KNR-ip pitsanngorsarneqarnissaa angusinnaajumallugu allannguivugut, tusagassiuuteqarnermut Naalakkersuisoq Peter Olsen (IA) oqarpoq.
Inatsisissatut siunnersuut (UKA2022 imm. 116) ajornartorsiutitaqanngitsumik Inatsisartunit akuerineqarpoq.
Siammasinnerusumik aallakaatitsisoqartarnissaanik ataatsimiititaliaq kissaateqarpoq
Taamaattorli inatsisitigut aaqqiinerup saniatigut Inatsisartuni partiit tungaannit soqutigineqarnerujussuuvoq KNR-ip aallakaatitsisarnermini nutaarsiassiisarnerminilu sineriak tamakkernerullugu aallakaatitassiortarnissaa
Siumut sinnerlugu ataatsimiititaliami ilaasortat ilaat aamma ataatsimiititaliamut siulittaasuusoq Doris Jakobsen Jensen (S):
- Sinerissamit tusagassiisarnerit annikinneerarsuupput, Nuummiillu tusagassiorneq annertunerujussuarmik ingerlanneqarluni. Taamaattumik taanna akuersaarnagu kissaatigaarput Inatsisartullu ataatsimiittarfiannit Siumut sinnerlugu kissaatigaarput sineriammit tusagassiisoqartarnissaa annerulersinneqassasoq, Doris Jakobsen Jensen (S) oqarpoq.
KNR-ip pisortaa: Aningaasarpassuarnik naleqassaaq
KNR TV-kkut radiokkullu aallakaatitassiornissaminut aammalu nutaarsiassaqartitsinissaminut ukiumut 71 millioner koruuninik tunineqartarpoq.
Naallu massa aningaasat tusaannarlugit amerlagineqarsinnaassagaluartut, taakku atorneqartarput suliffeqarfiup pisussaaffimminik, kiffartuussinissamik isumaqatigiissummi allassimasunik naammassinninnissamut. KNR-ip pisortaa Karl-Henrik Simonsen imatut erseqqissaavoq:
- Innuttaasunik kiffartuussinissamut massakkutut isikkua malillugu aningaasat taakku naammapput. Tassa ullaarnganiit unnukkut nalunaaqutaq arfineq tikillugu nutaanik aallakaatitassiornermut aammalu TV-kkut ullormut naluaaquttap akunnerinik marlunnik aallakaatitassiornermut atorneqartarput, Karl-Henrik Simonsen erseqqissaavoq nangillunilu:
- Taakku annertusissappata sinerissamilu immikkoortortaqarfeqalissappat, taava allatut ajornaqaaq studiaqarfeqartariaqarpugut, assiliiveqartariaqarpugut, immiussisarfeqartariaqarpugut assigiinngitsunillu aallakaatitassiornermut atortunik pisariaqartitsissaagut, taakkulu aningaasarpassuarnik naleqarput, KNR-ip pisortaa erseqqissaavoq.
Karl Henrik Simonsen-ip erseqqissaatigaa KNR ukiuni kingullerni marlunni sinerissap sinnerani nukittorsaasimasoq, maannalu Qaqortumi, Sisimiuni Ilulissanilu ilanngutassiortunik sulisoqartoq. Tamatumalu saniatigut sinerissamit aallakaatitassianik 100 tiiminik sivisussusilinnik pisiniartarnissaminut pisussaaffini KNR-ip naammassisaraa.
Doris Jakobsen Jensen (S) erseqqissaavoq partiini piumasssuseqartoq KNR-ip amerlanerusunik aningaasaliiffigineqarnissaanut suleqataaruttoq:
- Isumaqarpunga oqaloqataasariaqartugut. Qanoruna pisariaqartitsisoqartoq KNR-ip aallakaatitassiortarnera siammasinnerusumik inerisarneqaqqissappat, sunaana pisariaqartinneqartoq, taanna uagut aamma suleqataaffigerusupparput, Doris Jakobsen Jensen (S) naqissusiivoq.
