Atugarliortut toqorartut
Københavnimi, kalaallit inuuniarnikkut ajornartorsiortut ornittagaannik, Kofoedsskolemik atuisuusut, kalaallit angutit inuusuttut tallimat missaanniittut qaammatit marlussuit kingulliit ingerlaneranni toqukkut qimagupput, tamannalu aanngajaarniutinik imigassamillu annertuumik atornerluisuunermik pissuteqartoq, Københavnimi Kofoedsskolemi aqutsisoq, Kurt Olsen oqarpoq.
Kurt Olsenip oqaatigaa Københavnimi kalaallit angutit inuusuttut arlaqartut, Kofoedsskolemillu atuisuusut, inuuniarnikkut annertuumik ajornartorsiuteqartuusut, imigassamik ikiaroornartunillu atornerluisuunertik peqqutigalugu.
Piffissami kingullermi angutit toqukkut qimaguttut ilaat angerlarsimaffeqanngitsut angerlarfimaffeqanngitsunullu unnuisarfinni najugaqartuusut, ilaallu namminneq ineqartuusut Kurt Olsenip oqaatigaa.
- Uani angutit pineqartut tassaapput angutit aningaasaqarniarnikkut ajornartorsiutillit, tamaalillutillu iluamik peqqinnartumik nerisaqarnissaminnut akissaqanngitsut, bussinut qimuttuitsunulluunniit akissaqanngitsut imigassartorpallaartullu, Kurt Olsen oqarpoq.
Piffissami kingullermi Danmarkimi aputeqartupilussuuvoq silaannarlu nillertorujussuulluni, angerlarfimaffeqanngitsunullu inuuniarneq tamakkuninnga pissuteqartumik artornarnerulersitsivoq.
- Maannakkut Danmarkimi sila pitsaanngittorujussuuvoq, aputeqarluni issillunilu, inullu iluamik nerisaqartanngikkuni timi akiuussutissakinnerulertarpoq, timikkullu aseruuttoornissamut allanullu nappaatinut inuk ulorianartorsiornerulertarpoq. Atornerluisuugaannimi nappaatinut timi iluamik akiuussutissaqarneq ajorpoq, taamaattoqartillugu inuup peqqissumik inuuneqarnissaa ajornarnerulertarpoq, Kurt Olsen oqarpoq.
