Atuartut sømandshjemmimi najugaqarallassapput

Katillugit 415-it Aasianni ilinniarnertuunngorniarfimmut qinnuteqarsimapput, taakkunanngalu katillugit 168-it akuerineqarsimapput. Avannaata Ilinniarnertuunngorniarfia 186-inik inissaqartitsivoq, taakku saniatigut inissat 37-it attartugaapput.

Aaron Rafaelsen ilinniartut iniutaannik nakkutilliisoq oqarpoq, ukioq manna inissanik minnerpaamik 30-nik amigaateqarlutik.

- Inissaatigisagut arlaqangaatsiaraluarput, aallartittussalli amerlaneri peqqutigalugit. Atuartut inissaannik Ini A/S inuinnaallu aqqutigalugit attartornikuuvugut, Aaron Rafaelsen oqarpoq.

Ilinnialerniarlutik aallartittussat inissaqartinnissaat qulakkeerniarlugit, saniatigut Sømandshjemmimi init Hotellejlighedillu attartortariaqarsimavaat. Misilittakkallu aallaavigalugit qaammatit pingasut missaanni taakku attartorneqakkajuttut Aaron Rafaelsenip eqqaavaa.

- Atuarnerup aallartisimalernerani qaammatit siulliit marluk pingasut unerartut arlaqarsinnaasarput, taakkulu unerarneranni utaqqiisaasumik inissinneqarallarnikut, nalinginnaasumik attartukkatsinnut utertittarpavut, Avannaani Ilinniarnertuunngorniarfimmi ilinniartut iniutaanni aqutsisoq oqarpoq.

Nunatsinni ilinniarnertuunngorniarfiit allat paasiniaavigigaluarpavut, aasamili sulinngiffeqarnerat pissutigalugu tamanna iluatsinngitsoorpoq.

Ilinniarnertuunngorniarfinnut ukioq manna qinnuteqartut katillugit 1023-upput, taakkunanngalu aaffaat 576-it ilinnialernissamut akuerineqarlutik.