Atuartut pitsaanerusumik siunnersorneqarnissaat anguniarpaat

Meeqqat atuarfianni atuartitaanerup ilaatigut ajornartorsiorfiunera ilaatigut pissutaalluni, inuusuttut ilinniarnerminnik maanngaannaq unitsitsiinnartartut suli amerlapput. Ilinniarfeqarfinnilu siunnersuisartut Nuummi maanna taamaammat isumasioqatigiissinneqaleruttorput, ilinniarfeqarfinni siunnersuisarnerup pitsanngorsarneqarnissaa anguniagaalluni.

Inuusuttut ilinniarnerminnik unitsitsiinnartartut sapinngisamik amerlavallaannginnissaat isumasioqatigiinnermi pingaarnertut anguniagaavoq, inuusuttulli ilinnigassamik toqqaaniarnerannut siunnersuisarnerup pitsaanerulernissaa aamma anguniagaavoq.

Tassami inuusuttut ilinniakkamik aallartitsigaluariarlutik ilinniakkamik allamik aallartitseqqikkaluariarlutik maangaannaq aamma unitsitseqqittarnerat aamma takussaavoq. Siunnersuisarneq taamaammat pitsanngorsaavigineqarnialerpoq, ilinniarfeqarfinnilu assigiinngitsuni siunnersuisartut Nuummi ulluni makkunani taamaammat isumasioqatigiissinneqarlutik.

Siunnersuisarnermut tunngasunik Aarhusip Universitetimi lektori Lisbeth Højdahl isumasioqatigiinnermi saqqummiisuuvoq, pikkorissartitsisuullunilu.

Inuusuttut ilinniakkaminnik unitsitsiinnartarnerannut pissutaasut annersaasa ilaat tassaavoq siunnersuisarnerup ullumikkutut aaqqissugaanera. Ilinniarfeqarfinni siunnersuisartut isumasioqatigiissinneqarnerannut ataqatigiissaarisoq Janus Chemnitz Kleist, taama oqarpoq:

- Inuusuttut amerlanerit ilinnialernissaat anguniagaavoq, ilinniarusutaminnillu ilinniagaqalernissaat pingaaruteqarluni. Pitsaanerusumillu siunnersuisarnissaq matumani pingaaruteqarpoq, ilinniartut ilinniakkaminnik unitsitsiinnartartut sapinngisamik ikittuinnaanissaat taamaalinikkut anguneqarsinnaassammat, Janus Chemnitz Kleist, ilinniarfeqarfinni siunnersuisartut isumasioqatigiissinneqarnerannut ataqatigiissaarisoq oqarpoq.

Assersuutigalugu ilinniarnertuunngorniarfinni ilinniartut sisamararterutaat sinnerlugit ilinniakkaminnik unitsitsiinnartarput, ilinniartut piumassusaasa amigaateqarnerat, ilinniarusussuseqarnerisalu killeqarnerat ilaatigut matumani pissutaapput, lektori Lisbeth Højdahl oqarpoq, meeqqallu atuarfianni allanilu ilinniartitaanerup qaffasissusaata killeqarnera tikkuarlugu.

Atuartunillu ilinniartunillu siunnersuisarnerup pitsanngorsaavigineqarnissaa aaqqiissutissanut ilaasinnaasoq, Janus Chemnitz Kleistip neriuutigaa:

- Ilinniarfeqarfinni siunnersuisarnerup inatsisitigut toqqammaviata nutaanngorsarneqarneratigut periarfissat nutaat ammaaffigineqarnikuupput, meeqqat atuarfiisa Piareersarfiillu akornanni annertunerusumik suleqatigiittoqartalernissaa ilaatigut siunertaalluni. Siunnersuisarnerullu pitsanngorsaavigineqarnissaa anguneqarsinnaassalluni, Janus Chemnitz Kleist oqarpoq.