Atuartut klassit tallimat oquk pillugu nuutsitaapput
Uummannami Atuarfik Edvard Krusep qalia 1000 kvadratmeterisut annertutigisoq oqoqalersimasoq siorna oktobarimi paasineqarpoq. Tassani init atuartitsiffigineqartut 16-it matuneqarput, katillugillu atuartut 90-it atuarfiup avataani atuartinneqalerlutik. Atuartitsiffigineqartut tassapput meeqqerivik, INI A/S-ip iniitai marluk, aamma meeqqat soraaraangamik ornittagaat.
Uummannami Atuarfik Edvard Krusemi pisortaagallartoq, Gry Vold ilinniartitsisut atugarisaat pillugit ima oqarpoq:
- Ilinniartitsisut atugarisamikkut pikkunartorsiorput, qujanartumilli tiimikkaartunik ilinniartitsisaramik, arpaqasaqattaartariaqarnatik sulipput, Gry Vold oqarpoq.
Oqaatigineqarpoq ajornartorsiut ukiut pingasut-sisamat matuma siornagulli maluginiarneqarsimavoq.
Atuartut atuarfiup oqoqarnera qanoq maluginiartarsimanerpaat?
- Soorunalimi malugisaqartoqartarpoq, soorlu niaqorlunnertigut. Kisianni atuarfiup oqoqarneraneersuunersut uppernarsaatissaqartinngilarput, Gry Vold oqarpoq.
Atuarfik Edvard Krusemi siulersuisuini siulittaasoq, Therkel Mathiassen meeqqat oqumik malussartarsimanerat pillugu ima oqarpoq:
- Maluginiarneqaleqqaarsimavoq atuartut nammineerlutik inuunilullutik soorlu niaqorlullutik ipilertuusillutik misigilermata. Inuit naammagittaalliortalermata tamakku tunngavigalugit, paasiniaanerit pimoorullugit ingerlanneqalerput, Therkel Mathiassen oqarpoq.
Qanoq isumaqarfiginerpaa meeqqat atuarfiup avataani atuartinneqartarnerat?
- Ajorisinnaanngilara, aamma ajunngitsumik aaqqissuussineruvoq. Kisiannili pitsaanerussagaluarpoq sungiusimassaminni klasseqartuugunik, Therkel Mathiassen oqarpoq.
Atuarfik Edvard Krusep qaliarpaani oqoqalersimanera pillugu Qaasuitsup Kommuniani sanaartornermut pisortaq Jan Erik Andersenimut apeqqutigaarput qanoq iliuuseqarfigissaneraat. Akivoq, naatsorsuutigalugu atuarfiup nutarsarneqareerluni novembarimi iserterfigineqarsinnaanissaa, taamatullu naatsorsuutigineqarluni aningaasat 3 millioni koruunit missaanniittut atorneqarnissaat.
- Tamanna allatut pisinnaanngippat taamaassaaq, kisianni ajuusaarnarpoq taama sivisutigisumik piluusaarnerat, Therkel Mathiassen oqarpoq.
