Atuartut erngup pingaaruteqassusaanik ilinniartinneqarput
Nuuk Imermi aaqqissuussineq ingerlalluarpoq. FN-ip suleqataaffigisaanik Nunarsuaq tamakkerlugu allagartarsiualiornermik unammisitsinermut Drop by Drop-imut (Kuseriarnerit tamaasa) assingusumik titartaasitsilluni unammisitsisoqarpoq. Atuartut titartagaasa ilaannik pingasunik nr. 1, 2, 3-inngortitsisoqarpoq.
Atuarfik Hans Lyngemit peqataasortartussaagaluarpoq, silarlunnerali atuartitsisumillu napparsimasoqarnera pissutigalugu piffissaq kingulleq peqataasinnaajunnaarput. Atuartulli imeq aamma piujuaannartitsineq pillugit sukumiisumik sammisaqarsimammata, marlunngorpat taakkununnga aaqqiissuussiniarluta aalajangerneqarpoq, tamatumanilu aamma Nukissiorfiit Nuuk Imerlu peqataassapput.
Nuuk Internationale Friskolemi atuartut, silarlukkaluaqisoq takkussinnaasimasut, imeq piujuaannartitsinerlu pillugit sammisaq soqutigisupilussuusimavaat. Atuartullu Nuuk Imermi angallanneqarnerminni Nukissiorfinneersumullu sorpassuarnik apeqquteqarput