Atuartut angusaat appariarput
Esekias Therkelsen Ilinniartitaanermut Ilisimatusarfimmi Naliliisarfimmeersoq, misilitsissutinillu misissueqataasimasoq ima oqarpoq:
- 3.klassemi 7.klassemilu atuartut atuartitsissutini amerlanngitsuni 2006-imili ukiut tamaasa misilerartarpagut, siuariartornerlu arlalitsigut takusarsinnarlugu, 2009-miit 2010-mut ikaarsaarnermi takusinnaavarput siuariartorneq unikaallassimasoq imaluunniit kinguariarsimasoq, Esekias Therkelsen oqarpoq.
3.klassemiit 4.klassemut aammalu 7.klassemiit 8.klassemut ikaarsaarnermi misilitsissutit Inerisaaviup 2006-imiit misissuiffigisimavaa, kisitsisillu takutippaat fagini aalajangersimasuni misilitsinnermi angusat ilaat ukiuni kingullerni marlunni pingaartumillu 2009-miit 2010-mut kinguariartut.
- 3.klassemi kalaallisut angusat 2006-imiit pitsanngoriartortut takusarparput, taamaaaginnarpullu, soorlu aamma tuluttut 7.klassemi angusat taamaaginnartut, kisianni matematikimi qallunaatullu 7.klassemi angusat kinguariartortut aamma takusinnaavarput, Esekias Therkelsen oqarpoq.
Meeqqat atuarfiannik peqqussummik 2002-meersumik, tassa Atuarfitsialammut tunngassuteqartumik, Ilulissani isumasioqatigiissitsinikkut naliliigallartoqarpoq, tamannalu pillugu nalunaarusiortoqarluni.
Peqqussut 2002-mi akuersissutigineqarpoq, 2003-milu upernaakkut atuutilersinneqarluni, sulilu misissuisoqartussaammat Esekias Therkelsen annertunerusumik suli oqaaseqarsinnaannginnerarpoq:
- Kisitsisit pissarsiavut malilllugit amigaatitut taasinnaavara atuartitsissutit ataasiakkaarlugit iserfigalugit misissuiffiginissaat, tamanna amigaatigaarput. Kisitsisit pissarsiavut apeqqutinik amerlanernik saqqummiipput, taamaammat misissuinerit suli annertunerusut amigaatigaavut, Esekias Therkelsen, Inerisaavimmeersoq oqarpoq.
Inerisaavik - Ilinniaatsinut Instituti naliliigallarnermik aaqqissuisuuvoq, suleqatigalugit kommunit kattuffiat KANUKOKA, ilinniartitsisut kattuffiat IMAK aamma Ilinniarfissuaq.
