Atuartunut tapit atorunnaassapput

11.300 koruunit akileraaruserneqanngitsut, ilaqutariit pissakinnerpaat

klassini qullerni atuartuuteqarnerminni 2008-mi pissarsiaraat.

Ilaqutariinnermut Ataatsimiititaliami amerlanerussuteqartut isumaqarput, tapiissutit taamaattut isumaginninermut inatsisikkut isumagineqartariaqartut.

Tapiissuteqarnikkut meeqqat atuarnissamut kajumissaarneqartaraluarput, meeqqat ilaquttaminnut tapertaallutik sulinissaat pisariaqarunnaarsinniarlugu.

Kisianni ataatsimiititaliami amerlanerussuteqartut isumaqarput, tapiissutit siunertaat qaangiutereertoq.

- Meeqqat atuaqqullugit akilerneqartussaanngillat. Isumaqarpugut, atuarfiup suliassarigaa, meeqqat ilisimasassaannik tuniorassallugit, angajooqqaallu meeqqamik atuarnissaat akisussaaffigigaat, Inuit Ataqatigiinneersoq Jane Petersen oqarpoq.

Atuarnermili tapit atuutiinnartariaqartut, Illuatungiliuttut ataatsimiititaliami sinniisaat isumaqarput. Atassummeersoq Knud Kristiansen oqarpoq pissakinnerpaat eqqugaassaqisut:

- Inuusuttuaqqat ilaasa oqaluttuuppaatigut, saniatigut sulisariaqalissallutik. Soorunami tamarmik taamaannavianngillat, kisianni tamaat isigigaanni tapit atorunnaarnerat sunniuteqartussaavoq, ilaqutariit inuunerannut aammalu atuartunut namminernut.

Siunnersuut 2009-mi ukiakkut ataatsimiinnermi oqallisigineqaqaaq. Inatsisartut ullumi aappassaaneerlugu oqaluuserissavaat.