Atuarfiup, angajoqqaat aamma atuartup suleqatigiinnerunissaat ujartorneqarpoq

Meeqqat atuarfianni naammassisartut ingerlaannarlutik ilinnialerneq ajornerat iliuuseqarfiginiarlugu angajoqqaat akisussaaffimmik tiguseqqullugit Demokraatineersup Anda Uldumip ippassaq oqariartuutaa Qasigiannguani Juunarsip Atuarfiata siulersuisuini siulittaasup Karl Poulsenip ilalerpaa.
Allattoq Thora H. Nielsen
marsip 11-at 2014 10:09

- Angajoqqaat kaammattuinerusariaqalerpugut, soorunami angajoqqaaqarpoq aqutsilluartunik kisianni aamma peqarpoq killiliinissamut inorsalaartunik. Angajoqqaat killiliinissamut inorsalaartut ataatsimeeqatigisarnerisigut isumasiorneqartalersinnaapput kiisalu angajoqqaat meeqqaminnik angerlarsimaffimminni oqaloqatiginninnerulernerisigut kajumissaarinerulersinneqarsinnaapput.

Nuummili Ukaliusap Atuarfiata siulersuisuni siulittaasoq Paniaraq Søltoft isumaqarpoq meeqqat atuarfianni naammassisartut amerlanerusut ilinnialernissamut piareersarnissaannut angajoqqaat kisimik akisussaasuunngitsut. Atuarfiup, angajoqqaat meeqqat atuarfianniillu naammassisussap suleqatigiinnerulernissaat matumani pisariaqartoq erseqqissaatigaa.

- Atuarfinni ilinniartitsisoqarpoq aalajangersimasumik siunnersuisartunik, taakku angajoqqaat peqatigalugit atuartuutitik qitiutillugu siunnersortussaavaat suliamullu tamatumunnga aningaasarsiaqartinneqareerput, Paniaraq Søltoft oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq