Atuaqatigiit pujortartuunngitsut toqqarneqarput
Atuaqatigiit pujortartuunngitsutut taaguutip toqqagaassutiginerata saniatigut akissarsiarivaat 30.000 koruunit.
Mathias Storchip Atuarfiani 6.a-mi aamma 6.b-mi atuartut ajugaatinneqarput ima tunngavilersorneqarlutik:
- Klassit taakku marluk pujortartuunngillat, pujortartartuunerullu periaasia kingunerilu misissorsimavaat, aamma tujormitinneqartarnerup kinguneri misissorsimavaat kiisalu meeqqap alliartornerani pujortarnikkut akornusersuutaasartut, peqqissusaanut, qiimassuseqarneranut ilikkagaqarnissaanullu pujortartarnerup kinguneranik meeraanermi inuusuttunngornermi kingornalu inersimasunngornermi ajoqusiisarneri misissorsimallugit. Paarisa tusagassiuutinut nalunaarummini taama allappoq.
Tamakku saniatigut atuaqatigiit aamma misissorsimavaat pujortarunnaarnissamut pujortanngiinnarnissamullu periarfissat.
Taamaalioreeramik kingorna innuttaasunut Sermermiuni suliniuteqarsimapput pujortartarnerup ajoqusiisarnera pillugu paasititsiniaallutik, neqerooruteqarsimallutillu meqquteeqqanik kapuuinikkut pujortarunnaarsartinnermik.
Aamma pujortarunnaarniartunik eqimattanik sapaatip akunneranut ataasiarlutik naapittartunik pilersitsisimapput.
Taakkualu saniatigut januarip qiteqqunnerani pilersaarutigaat innuttaasunut pujortarunnaarniartunut pikkorissaasoqassasoq.
Innuttaasullu pujortarunnaarniarlutik pikkorissarnissaannut meqquteqqaanillu kapoortillutik pujortarunnaarniarnissaannut allatsinniassammata novemberimi decembarimilu marlunngornerit tamaasa allagartanik illoqarfimmi agguaasarsimapput, kiisalu illoqarfiup radioatigut aamma KNR radiokkut aallakaatitsisimallutik.
Paarisa allappoq atuaqatigiit naammaginartumik nalunaarusiorsimasut.
- Suliniutaasimasut siamasissumik ataqatigiissaarneqarsimallutik aammalu ersarissumik suliassat atuartut akornanni naammassilluarneqartarsimapput. Atuarfiup nalinginnaasumik atuartitsineranut fagit akimorlugit akuliussuunneqarsimallutik. Paarisa tusagassiuutinut nalunaarummini taama allappoq.
Ukioq manna atuaqatigiit arfineq marluk unammisitsinermi peqataapput. Katillugit atuaqatigiit arfineq pingasut peqataaniarlutik nalunaarsimagaluarput, nalunaarusianillu unammissutaasussanik nassitsisimallutik. Atuaqatigiit ataatsit unammisitsinermi piumasaqaatit naammassisinnaanngimmatigit unamminermit taamaatittariaqarsimapput, tassami atuaqatigiit akornanni suli pujortartartoqarsimammat.
Paarisa upernaamut Atuaqatigiit Pujortartuunngitsut 2011 atuartunut akullerniittunut unammissutigiteqqissavaa, ajugaasunut eqqugassaaqqissallutik 30.000 koruunit.
