Atuaqatigiit Pujortartuunngitsut 2012-imi ajugaasut Ilulissaneersuupput
Atuaqatigiikkuutaat 15-it nunamit tamarmeersut unammisitsinermut peqataaniarlutik nalunaartut ersarissunik malittarisassiuunneqarsimapput. Suliassat pingaarnersaraat atuaqatigiit iliuusissatut pilersaarusiussagaat atuaqatigiinni pujortartalertoqannginnissaa qulakkeerniarlugu qanoq iliuuseqarsinnaanerlutik. Peqataanissamut piumasaqataatigineqartut allat tassaasimapput atuaqatigiinni peqqinnerulersitsisinnaasunik sammisaqarnermi siammarsaanermilu pingaartillugit qitiutinneqassapput atuartut namminneq pilersitsisinnaanerat peqatigiillutillu iliuuseqarsinnaanerat, kiisalu unammisitsinerup naammassinerani atuaqatigiinni pujortartunngortoqarsimannginnissaa.
-Internetti, atugaateqarfik atuartullu ulluinnarni naapittagaat atorlugit pujortartarneq pillugu paasissutissanik ujarlersimavugut, pujortarunnaarniarnerullu inersimasunut qanoq ajornakusoortiginersoq atuartut paasilertupallappaat. Angusavut takutinniarlugit isiginnaartitsissusiorpugut angajoqqaanullu atuarfimilu atuartunut anginernut isiginnaartitsissutigalugu. Inersimasut arlallit pujortarunnaarnerannik tamanna malitseqarpoq, tamannalu atuartunut kajumilersitsivoq, Inger Degn, Suusi Nikolajsen peqatigalugu Ilulissani Atuarfik Mathias Storchimi 5.a-ni atuaqatigit pujortartuunngitsut pillugit suliniummi ingerlatsisuusoq oqaluttuarpoq.
Atuarfik Mathias Storch-imi 5.a-t ukiormanna unammisitsinermi ajugaasuunerinut arlinnik pitsaasunik peqqutissaqarpoq. Ilaatigut unammisitsinerup naammassinerani atuaqatigiit tamarmik pujortartuunngillat. Aammattaaq atuartut pujortarunnaarniarnermi ajornartorsiutaasartut kusanartupilussuarmik filmiliarisimavaat.
-Angajoqqaat akuulersinnissaat siusissukkut isumaqatigiissutigaarput, meeqqammi angerlarsimaffimminni isumassarsiortarmata. Suleqatigiinnerput pitsaalluinnartumik ingerlasimavoq, suliniutigisarpullu isiginnaartitsissusiatta filmiliarineqarneranik kinguneqarluni. Ataatsimut isigalugu unammisitsinermi ajugaanerput naammagivarput, tamannalu nuannaarutigeqalugulu tulluusimaarutigeqaarput, Inger Degn knr.gl-imut oqarpoq.
Atuaqatigiinni 18-iusut ilinniartitsisuilu marluusut aningaasarpassuit sumut atorniarnerlugit suli naluaat, peqataasulli tamarmiullutik angalanissaannut immaqa atorneqarumaarput.