Atuakkiortuuneq atuarfimmi sammivaat
Taamatut sammisaqartitsinermik isumassarsisoq ilinniarnertuunngorniarfimmi siornatigut qallunaatut ilinniartitsisoq. Taassuma atuakkiortoqatini pingasut ilaserisimavai, taakkuullutillu inuusuttut atuakkiornermut unammisitsinermut Allatta - inuusuttut nunatsinni nunarsuarmilu'-mi peqataanissaannut piukkunnarsarsimavaat.
- Sammisaqartitsineq workshop atorlugu qallunaatut atuartitsineq soqutiginarnerulersinniarsimavarput ilinniartullu tamanna peqataaffigilluarpaat. Atuakkiap pilersinniarnerani aallartisartarneq paasisaqarfigaat. Soqutiginninneq apeqquteqarusunnerlu annertupput taamatuttaarlu ilinniartut peqaalluartorujussuullutik Aasiann GU-mi rektori Flemming G. Nielsen oqarpoq.
GU-mi ilinniartut sammisaqarnerannut atatillugu kikkunnut tamanut ammasumik atuakkanik atorniartarfimmi atuakkiortut taakku sisamaallutik atuakkiortutut sulinertik oqaluttuaraat sunalu tunngavigalugu allakkusuummertarnertik oqaluttuaralugu.
- Taakku sisamaallutik assigiissutigaat noqitassaanngitsumik allakkusuummertarneq. Atuakkiortutut pikkorissusertik pissutigalugu atuakkiaat saqqummersimapput skuffit arlaannut ilineqaannaratik. Neriuppugut ilinniartuutivut allakkusuummertinneqarsimassasut aammalu neriuutigalugu soraarummeerluni misilitsinnermut tamanna sunniuteqarumaartoq, Flemming G. Nielsen oqarpoq.
Ilinniarnertuunngorniarfimmi inissat killeqarnerat pissutigalugu ukioq kingulleq ilinniartut kisimik peqataatinneqarput, ukiunili aggersuni taamatut suleriaaseqartarnissaq rektorip periarfissaalluarnerarpaa taamaasillutik ilinniarnertuunngorniarfimmi ilinniartut tamarmik periarfissaqarniassammata atuakkiortuunerup allatallu aaqqissuuttarnerat pillugu paasisaqarneruniassammata.