Atuakkiortutut piukkunnartut qulit toqqarpaat
Nunatsinni nunarsuarmilu inuusuttuuneq qulequtaralugu oqaluttuaaraliorluni unammisitsinermi oqaluttuat 36-it nassiunneqarput. Allaaserineqartut pitsaassusaat aaqqissuisut assut nuannaajallaatigaat.
- Inuusuttut oqaluttualiornerminni nutaamik eqqarsarlutik allassimanerat alutoreqaarput. Atuakkiortussamaatit isumalluarnaqaat, naliliisartut nalunaarput.
Unamminermi ajugaasut tassaapput:
Maaliaaraq H. Nielsen Nuummiit
Niviaq Korneliussen Nuummiit
Paninnguaq Boassen Sisimiuniit
Miiannguaq Olsvig Lyberth Nuummiit
Johannes Lars Therkelsen fra Aasiaat
Pivinnguaq Mørch Nuummiit
Tukummeq Danielsen Aasianniit
Gerda Berthelsen Sisimiuniit
Sørine Steenholdt Nuummiit
Rosine Kreutzmann Sisimiuniit.
Taakku checkimik 2.500 koruuninik aningaasartalimmik pissarsinermi sanatigut allannermut pikkorissarluni Kangerlussuarmi sungiusarnissamut periarfissinneqarput. Tassani ilitsersuisuussapput atuakkiortoq Jessie Kleemann aamma atuakkiortoq Mette Moestrup.
Sungiusarnermi oqaluttualiat suliareqqinneqassapput 2013-illu ingerlanerani atuaganngorlutik saqqummersinneqassapput tassanilu eqqumiitsuliornermik ilinniartut assiliartaanik ilusilersuisuussapput.
-Oqaluttualiat ullutsinni inuunerrmi nalaanneqarsinnaasunik ajunngitsunik ajortunillu oqariartuuteqarput. Arlallit nipangiutiinnartakkanik allaaserinnissimapput allallu inuunerminni siumut qanoq ingerlariaqqissinnaaneq pillugu pissanganartumik oqaluttuarsimallutik. Oqaluttualiaasa Kalaallit Nunaanni atuakkat silarsuaanni inerikkiartorneqartoq takutippaat, naliliisut nalunaarput.
Naliliisut tassaapput atuakkiortoq Jessie Kleemann, lektor Birgit Kleist Pedersen, Kalaallit Atuakkiortut siulittaasuat Hans Anthon Lynge aamma taalliortoq Katti Frederiksen.
Allattamik unammisitsinermik aaqqissuisuupput Nunatta Atuagaateqarfia, Nunat avannarliit piorsarsimassutsikkut attaveqaataat NAPA, Nuummi inuusuttut siuarsartut NUIF atuakkanillu saqqummersitsisarfik Milik Publishing
.
