Atuakkiortunngorniat isumassarsiorlutik angalasut

Atuakkiortut inuusuttut ilagaat Tukummeq Danielsen, taannalu atuakkiortutut inuussutissarsiuteqarnissaminik takorluugaqarpoq.

- Atuakkat atuarnikuusakka iluaqutigisimaqaakka. Taamaammat atuakkiortunngornissara takorloortuarsimavara, taamaalillungami allanik ikiusinnaassagama, oqarpoq.

Allattamut peqataanini iluaqutigisimanerarpaa, maannami ammanerunissaminut allaaserisaqarnissaminullu sapiissuseqarnerulersimavoq.

- Unammisitsinermut peqataasimanngitsuuguma imminut tatigivallaarsimassanngikkaluarpunga. Oqaluttuaaraliara inuit ilaannut pingaaruteqartutut immaqa isigilersimassanngikkaluarpara.

Allattamik aaqqissuisuupput Nunani Avannarlerni Piorsarsimassutsikkut Attaveqaat, Napa, kiisalu Milik Publishing NUIF-ilu Nuummiittoq. Kalaallit Illuutaanni pisortaq Leise Johnsen, Napami pisortaagallarami suliniummik aallartitseqataasoq isumaqarpoq Kalaallit Nunaanni atuakkiornermut atugassarititaasut ilungersunartuusut.

- Kalaallit Nunaanni inuit aalajangersimasut ikitsuinnaat saqqummersitassanik allaaserinnittarput. Oqaatsit tunngavigineqartut amerlavallaanngitsunit atorneqarput aammalu saqqummersitsisarfiit killeqarlutik, taamaammat atuakkiortarneq ilungersunartumik atugassaqarfiuvoq, uagullu matuminnga tapersersuiniarluta suliniuteqarpugut.

Allatta aqqutigalugu kalaallinik atuakkiortunik nutaat aqqutissiuunneqarsimanissaat qularutiginngilaa.

- Ilai Kalaallit Nunaanni saqqummersitsisarfik suleqatigalugu nammineq oqaluttualiorlutik aallartereersimapput, oqarpoq.

Inuusuttut angalanermi peqataasut quliupput, taakkulu ilaatigut Københavnimi atuakkiortunngorniarfik, Testrup Højskole aamma Göteborg Bogmesse tikeraassavaat, taakkunanilu Allattami oqaluttuaaraliatik svenskisuunngorlugit nutserneqaqqammersut nittarsaatissallugit. Inuusuttut ilaat marluk aamma Finlandimi inuusuttut atuakkiornermik festivalernerannut BUK-mut peqataasussaapput.