Atuakkiortoq: Ilinniarsimanngitsut amerlanerat kanngunartuliaavoq

Kalaallit Nunaat pillugu oqallisissiatut atuakkiaq nutaaq ima saqqalik: "Den grønlandske drøm: Polarparadiset - et folk på kant med fremtiden" saqqummerpoq.

Atuakkiortoq, tusagassiortoq, ukiorpassuarni aviisimi "Børsen"-imi pisortaasimasoq Jan Cortzen taassuminnga atuakkiortuuvoq. Kalaallit Nunaat pillugu misigisai, atuakkami 458-inik quppernilimmi pineqarput.

Atuakkami Kalaallit Nunaannik nuannarinninnermik, aammali Kalaallit Nunaata nutaanerusortaanik isorinninnermik imaqarpoq.

Atuakkap saqqummernerani atuakkiortoq oqarpoq, Kalaallit Nunaannut ilisimannittutut taaneqarusunnani. Tassa atuakkiortup nammineq takusaminik eqqarsaasersuutini pinnagit, inuit 33-t apersorsimasami isumaat atuaganngortippai.

- Atuakkami apersorneqartut Kalaallit Nunaanni inuussutissarsiornermik ingerlataqartuupput, Kalaallit Nunaanni suliamut pikkorillutik ukiorpassuarni sulisimagamik ilisimasaqarluartuullutik, Jan Cortzen nassuiaavoq.

Atuakkamilu sukujuppassuit samminineqarput.

Tusagassiortup inuussutissarsiornermik soqutigisaqartup sammivai Kalaallit Nunaanni inuussutissarsionermi aaqqissuussisimaneq, suliffeqarfiit pisortanit pigineqartut, politikki, inuiaqatigiit inooriaasiat, takornarialerineq aamma oqaatsitigut ajornartorsiutit kiisalu Kalaallit Nunaani ilinniartitaanerup ingerlanera.

Jan Cortzen isumaqarpoq, atuartorpassuit ilaginnarneqarsimasut, tamannalu Kalaallit Nunaanni ajornartorsiuterpassuarnut pissutaasoq, taamaasilluni Kalaallit Nunaanni ilinniartitaanerup ingerlalluannginnera pissutaalluni ineriartorneq arriinnerusumik ingerlalluni.

- Sallaatsumik oqaatigalugu; tupannarpoq, takullugu Kalaallit Nunaanni innuttaasut affaat sinnerlugit ilinniagaqanngitsut. Oqanngilanga sianiitsuusut - kalallit allatulli silatutigaat. Inuppassuaqarporli, tunngaviusumik ilinniagaqarsimanngitsunik, naminneerlutik pisariaqartitaminnik - aammalumi inuiaqatigiinni demokratiskiusuni pisinnaatitaaffigisaminnik, Jan Cortzen oqarpoq nangillunilu:

- Ukiuni 30-ni namminersorneruneq atuutereersoq, kalaallillu politikerisa Danmarkimiit akuliuffigineqannguaratik aningaasat qanoq atornissaat aalajangersinnaasimallugu, innuttaasut tamakkerlutik suli tunngaviusumik ilinniarsimannginnerat kanngunartuliatut isigaara. Ilinniarsimanngitsut nalligaakka, inuusuttullu pisariaqartitaminnik ilinniarsimannginnerat alianartutut isigaara, Jan Cortzen oqarpoq.

Tassalu atuakkiortoq isumaqarpoq, kalaallit akisussaaffimmik namminneq tigusinissaat piffissanngortoq.

- Oqartuaannarsinnaanngilagut, danskit pisuussutigigaat. Namminersorneruneq ukiuni 30-ni atuutereerpoq, maannalu Namminersorneq atuulluni. Tassalu politikkikkut pingaarnersiuinissaq apeqqutaavoq. Pingaarnersiuinissarlu ukiut 15-it 20-t matuma siorna pisimasariaqaraluarpoq, taamaalilluni ilinniartitaanerup aaqqissuussaanerani innarluut aaqqinneqarluni, Jan Cortzen oqarpoq.

Nunatsinni ilinniartitaanerup pitsaanngissusia tusagassiortup atuakkiortullu ernumanarteqaa. Nunatsinnimi suna isumallluarnartuutippaa?

- Innutaasut tunngaviusumik maannakkornik pitsaanerusumik ilinniartinneqarunik, paasisaqarusunnerulissapput isornarsinnaasunillu takunnissinnaanerulerlutik. Politikerinut piumasaqaateqarnerulissapput. Innuttaasut sunilluunniit piumasaqarnerusut takusinnaalissavatit. Immaqa aamma akerliunialissapput, isummaminnik nittarsaassinerullutik. Tassa namminneq isumaqarlutik takutitsissapput.

- Inuit siuttuminnut piumasaqaateqartut, sunillu pisoqarneranik paasinnerusuttut amigaataapput. Taamaammallu politikerit ukiorpassuarni piumasaminnik ingerlasinnaasimapput, Jan Cotzen oqarpoq.