Atuakkiorfimmit atuakkanik suli pisisoqanngilaq

Atuakkanik akitsorterussilluni tunininaaneq ullumikkumut killeqartinneqaraluarpoq, pisiumasunilli nalunaartoqanngimmat, akitsorterussilluni tuniniaaneq ullumik aalajagersimasumik killilernagu ingerlanneqassaaq, eqqartuussissuserisoq Advokat Wilhelm Malling Sermitsiamut oqarpoq. Atuakkat tuniniarneqarnerat piginnittussaatitaanerillu tuniniarneqarnerat eqqartuussissuseriffiup Mallingip isumagisarivai. Atuakkat 45.000-it piginnittussaatitaanermilli piumasaqaatitaqartut atuakkat 800-it 200.000 koruuninngorlugit tuniniarneqarput. Tuniniarneqartut pillugit saaffiginneqartarpoq, pisiumasunilli suli nalunaartoqanngilaq, Wilhelm Malling oqarpoq.

Atuakkat Atuakkiorfiup saqqummersissimasai akitsorterullugit tuniniarneqarnerat Atuakkiartut Peqatigiiffiata siulittaasuanit, Hans Anthon Lyngemit avaanngugineqarpoq. Atuakkat saqqumersinneqarnissaannut isumaqatigiissuteqartoqarpoq, atuakkanilli piginnittussaatitaanerup tuniniarneqarnissaa isumaqatigiissuteqarfigineqarsimanngilaq.

Eqqartuussissuserisup Wilhelm Mallingip erseqqisarpaa, atuakkiortut piginnittussaatitaanerat tuniniarneqanngitsoq, piginnittussaatitaaneq atuakkiortut namminneq pigereerpaat. Taamaattorli atuakkat 800-it saqqummersinneqarsinnaanerat pineqartoq.

Atuakkiat saqqummersinneqartut nungullugit tunineqarsimappata, atuakkap naqiterteqqinnissaa atukkiortup nammineerluni piumasarisinnaavaa, atuakkannillu saqqummersitsisarfiup ukiup affaata ingerlanerani naqiterisitsimanngippat, saqqummersitsisinnaanermut pisinnaatitaaffik atuakkiortup pisinnaatitaaffigissavaa, Wilhelm Malling oqarpoq.