Atuakkat nunatsinneersut bogforum-imi

Danmarkimi atuakkanik saqqummersitsinersuarmut - BogForumimut - Nunatsinni atuakkanik saqqummersitsisarfinnguaq Milik Publishing, ukiut siuliini pisarnermisut peqataassaaq, tamanna pissalluni Københavnimi tallimanngorpamiit sapaatip akunnerata naanera ilanngullugu.
Allattoq Elisa Isaksen
novembarip 08-at 2011 07:14

Atuakkanik saqqummersitsisarfiup saqqummersissimasaannik atuakkiortut arlallit saqqummersitsisarfiup tuniniaaviani naapinneqarsinnaassapput. Soorlu meeqqanut atuakkamik ukiormanna saqqummersitseqqaartoq Bolatta Silis Høegh, atuakkiani Aima, meeqqanut immikkoortortami sapaatiuppat ulloqeqqanut atuffassissutigissavaa.

Aamma Helene Thiesen eqqaamasalersaarummik "Maligassaatitaagama"-mik  atuakkiortuusoq aamma naapinneqarsinnaassaaq. Taassuma ilaatigut misigisai tunngavigalugit filmi "Eksperimentet", kalaallit meerartaannik 50-ikkunni qallunaanngorsaanermut tunngasoq filmiliarineqarpoq.

Assiliisartoq atuakkiortorlu Carsten Egevang, assilisanik atuakkiaminik taaguutilimmik 'Grønland - dyrenes og menneskenes land' aqagu saqqummersitsisussaq aamma naapinneqarsinnaassaaq atuakkiaminillu atsioqattaassalluni. Aamma Hans Jakob Helmsip atuakkiani 'Arsarnernut uinngiarsukkuit' atsioqattaassavaa.

Atuakkanik saqqummersitsinermi Milik Publishingip tuniniaavimmi ukiuni siullernisut, atuakkanik saqqummersitsisarfik "Atuagkat" suleqatigissavaa. 

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq