Atuakkat ilinniutit internetimiileqquai
Tamanna inatsisartuni §37-i naapertorlugu apeqquteqarsinnaatitaanermut Ilinniartitaanermut naalakkersuisup Palle Christiansenip akissutaani atuarneqarsinnaavoq. Nunatsinnimi atuakkat ilinniutinut piginnittussaatitaanermut inatsimmik pituttugaaqqammata. Tassa atuakkat qarasaasiamut nussorneqassappata atuakkiortoq atuakkiortulluunniit akuerseqqaarnerisigut aatsaat pisinnaammata.
Palle Christiansenimmi akissutaa naapertorlugu ilinniutit atuakkanik atorniartarfinni atorneqarsinnaanngussappata atuakkiortup akuerseqqaarneratigut tamanna pisinnaavoq. Atuakkiortorli akuersippat internettimut ikkunneqarnissaa akuersissummi ilaatinneqanngilaq, tassa immikkut tamatumunnga akuersisoqarsimanissaa pisariaqarluni.
- Atuakkanut piginnittussaatitaaneq qanganitsereeraangat aatsaat ajornaquteqanngitsumik internettimut ikkussuisoqarsinnaavoq. Tassa atuakkiortup toquneraniit ukiut 70-it aatsaat qaangiukkaangata tamanna pisinnaalluni, Palle Christiansen oqarpoq.
Piginnittussaatitaanermut suliniaqatigiiffik Copy Dan nunatta isumaqatigiissusiorfigalugu tapiiffigisarpaa, isumaqatigiissullu taanna naapertorlugu atuakkap imarisaasa 20 procentii kisimik ilaarlugit, tassa kopeerlugit ilinniartitsinermi atorneqarsinnaatitaallutik. Copy Dan-imulli isumaqatigiissut nutarsarneqartussanngormat Savalimmiormiut ilinniartitsinermut atuakkanik saqqummersitsisarfia NAM Inerisaaviup suleqatiginialerpaa, kalaallisullu naqinnilinnik ilinniarnermut atatillugu atuagassiat sapinngisamik amerlanersaat qarasaasiamut nussorneqarnissaat Savalimmiormiut, qallunaallu atuakkanik saqqummiisarfii suleqatiginerisigut piviusunngortinneqarnissaa siunertarineqarluni, Palle Christiansen nassuiaavoq, atuakkallu pineqartut kikkut tamaasa pisiarisinnaagaat oqaatigalugu. Atuakkalli ilinniutit tamarmik meeqqat atuarfiinut akeqanngitsunik agguaanneqartarput.
Inerisaaviulli atuakkanik saqqummersitsisarfiata ilinniutit saqqummersitai atuakkiortut peqatigalugit piginnittussaaqataaffigivaat.
- Tassa ilinniutit 500-uusut 10 imaluunniit 25 procentiinnai qarasaasiamut nussorneqassappata 2,5 aamma 3 millionit koruuninik naleqassaaq. Taamaammat ilinniutit taakku 500-t tamavimmik qarasaasiamut nussorneqarnissaat akisuallaarmata massakkorpiaq pilersaarutaanngilaq. Palle Christiansen Knud Fleischerimut akissutaani taama naqissusiilluni allappoq.
