Atuakkat ilinniartitsissutit Nunatsinnut tunngasut allanngortinneqarsinnaanngillat
Folketingimi ilaasortap Lars-Emil Johansenip, ilinniartitaanermut ministeri Bertel Haarder apeqqut taanna saqqummiutereeraalu taamatut akissutisivoq.
Aammali nunatta namminersulernera, periutsillu nutaat atuutilersut pissutaallutik Nunatsinnut pissutsinut Danmarkip atuartitseriaasaanut sunniuteqarnissaat, Bertel Haarderip isumaqataaffigaa.
- Meeqqat atuarfiini siulersuisut, ilinniartitsisullu Ilinniartitaanermut ministereqarfiup atuartitsinermut sinaakkutassiai malilluinnarlugit atuartitsisoqartartussaavoq, sumiiffinnilu atuartitsissutigineqartussatut pilersaarusiaasimasut atuartitsinermi atugassat suussanersut atuarfiup atuaqatigiillu namminneq aalajangingassaralugu.
Maleruagassat taakkorpiaat ilinniarnertuunngorniarfinni aamma atuupput, Bertel Haarder isumaqarpoq. Tassami ministeriaqarfiup ilinniarnissamut pilersaarusiai malillugit ilinniartitaanerup siunertai, sammisassartaalu tunaartarineqassapput, naak aalajangersimaqqissaartumik atuagassartaqanngikkaluartut.
- Danmarkimi atuagaarniarfiit kiffaanngissuseqarlutik ingerlasuupput, atuakkallu ilinniutit namminneq piorsartarpaat tuniniartarlugillu, tamannalu ilinniartitaanermut ministerimit akuleruffigineqarneq ajorpoq, ilinniartitaanermut ministerip, Bertel Haarderip Lars-Emil Johansenimut taama akissuteqarluni naqissusiivoq.
