Atuakkat 800-t tunniutiinnarneqarput

Saqqummersitsisinnaanermut pisinnaatitaaffiup Atuakkiorfimmit pisiarinissaanut soqutiginnittoqanngilaq, tuniniarnerani minnerpaamik 100.000 koruuneqarnissaat siunniunneqaraluarpoq, soqutiginnittoqanngilarli, eqqartuussissuserisoq Wilhelm Malling, atuakkanik tuniniaanermut isumaginnikkaluartoq, oqarpoq. Aviisimi Atuagagdliutini ullumi saqqummersumi tamanna allaaserineqarpoq.

Atuakkat aqqisa saqqummerseqqinneqarsinnaasut pisiarinissaannut soqutiginnittoqanngilaq, taamaattumik nunatta Katersugaasivianut toqqorsivianullu tunniunneqarput.

- Atuakkat kingulissatsinnut isumannaarneqassapput, suneqassanersullu suli isummerfigineqanngilaq, Nunatta Katersugaasiviani Toqqorsivianilu arkivari, Grete Rendal, oqarpoq.

- Inatsisilerituumik peqateqarluta tamaat eqqartussavarput, suneqassanersut isummerfigissagutsigu. Maannangaaq oqaatigisinnaanngilara qaqugu piariissanersugut, saqqummersitseqqinnissamullu pisinnaatitaaffik sussaneripput, Grete Rendal Atuagagdliutinut oqarpoq.

Atuakkat tuniniaqqinneqarsinnaasut tuniniarnerannut atatillugu atuakkat sinneri 45.000-it aamma minnerpaamik 100.000 koruunilerlugit tuniarneqarput, taakkuli aamma pilerigineqanngillat.

Atuakkat taakku 45.000-it Kommuneqarfik Sermersuumut maanna tunniunneqarput.