Atuagaq taallanik imalik innersuunneqartunut ilaavoq

Tungutaq Larsenip atuakkiaa taallanik imalik ' Nittaallatut' Nunat Avannaamioqatigiit atuakkiortumut nersornaasiuttagaannut innersuunneqartunut ilaavoq. Nersornaat ataqqinaataasoq 1962-imi siullermik tunniunneqarpoq, kisianni ukiut 50-it ingerlareeraluartut nersornaat suli kalaallimut tunniunneqarnikuunngilaq.
Allattoq Louise M. Kleemann
decembarip 08-at 2011 09:44

Tungutaq Larsen KNR-imi tusagassiortuuvoq kulturimullu tunngasunik sammisaqarluni. Siornatigut atuakkamik qallunaatuumik saqqummersitsereerpoq taaguutilimmik ' "En grønlænders primitive strøg", Ulomit saqqummersinneqartoq.

- Tungutaq Larsenip taallioriaatsimini nammineq misigisani avatangiisinilu aallaavigisarpai, aamma avammut isigisumik eqqarsartaaseqarpoq. Taallat ataatsimut isigalugit atuartartumut eqqarsalersitsipput. Naak saqqummersitaq kikkunnut tamanut tunngatinneqanngikkaluartoq taamaattoq atuartut pissarsiffigilluarsinnaavaat, Hans Anthon Lynge nersornaammut innersuunneqartumut oqaaaseqaatimini ilaatigut taama allappoq.

Atuagaq taallanik imalik ' Nittaallatut' Atuagkanit 2011-p ingerlanerani saqqummersinneqarpoq.

Nunat Avannaamioqatigiit atuakkiortunut nersornaasiuttagaat 2012 Reykjavikimi upernaakkut ataatsimiinnermi toqqarneqassaaq, akissarsisitsinerlu Helsinkimi novembarip aallartilaarnerani pissalluni.

Nunat Avannaamioqatigiit atuakkiortunut nersornaasiuttagaat ukiut tamaasa tunniunneqartarpoq anngaasanillu 350.000 koruuninik malitseqartarluni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq