Atuagagdliutit Sermitsiarlu oqaatsinut politikkeqalissapput

Kalaallit oqaasii aviisini marlunni suusupagisaanerarlugit isornartorsiuisoqareersorlu aviisini kalaallit oqaasii aallunneqarnerulissasut, aviisini marlunni akisussaasuulluni aqqissuisuulertussaq, Inga Dora Gudmundsdottir Markussen, neriorsuivoq.
Allattoq Jens Thorin
novembarip 20-at 2009 12:02

Aviisini kalaallisut allaaserisat allannerlutaavallaartut, Tusagassiornermut Instituttimi pisortaq Naja Paulsen, KNR-imut qanittukkut oqarpoq, aviisillu oqaatsinut poliitikkeqalernissaat kaammattuutigalugu.

Inga Dora Gudmundsdottir Markussenip kaammattuut tigulluarpaa.

- Tigulluarpara. Aamma oqaatsinut politikkeqalernissarput siunniupparput. Kisianni politikkeqarnissap oqaasertalersornissaa allaavoq, ulluinnarnilu suleriaatsimut ilaalersinnissaa aamma allaalluni, Inga Dora Gudmundsdottir Markussen, oqarpoq.

Aamma oqaatsinik pitsaasumik ulluinnarni atuinissaq, Atuagagdliutit aaqqissuisuata eqqumaffigissallugu neriorsuutigaa.

- Kalaallisut allaqqaarsinnaaneq uanga pingaartippara. Taamaammat Atuagagdliutini tamanna periarfissaareerpoq. Aamma nutserisutta pikkorissartuarnissaat nalilersuiffigineqartuarnissaallu suliniutigisariaqarparput. Kukkusaqattaarutta, sukkut kukkusarluta paasisariaqarparput. Oqaasilerifik suleqatigalugu nalilersuisalernissarput maanna sulissutigaara, Inga Dora G.Markussen oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq