Attaveqaqatigiit Danmarkimi efterskolertunik tapersersuissasut
Inuusuttuaqqat efterskolerniarlutik Danmarkimut ulluni makkunani aallakaapput, ilaallu apuussimalereerlutik. Nunamulli allamut nuunneq, oqaatsinik allanik atuilerneq danskillu kulturiannut allaanerusumut naleqqussarniarneq ilaannut oqitsuinnaaneq-ajorpoq.
Inuusuttuaqqat nunatsinneersut Danmarkimi efterskolertut 20 procentiisa missaat atuarnertik maannaannaq unitsillugu angerlaannartarput. Taamaammat Peqatigiiffiup Kalaallit Meerartaat atuarunnaaginnartartut ikilisinniarlugit kalaallinut efterskolertunut attaveqaqatigiinnut "Allu"-mik taagorneqartunut inuusuttuaqqat peqataanissaannik neqeroorfigisarpai. Suliniut 2015-imiilli ingerlanneqartoq:
- Inuusuttuaqqat 20-t Allu siorna 2015-imi peqataaffigaat, aamma misilittagaqarfigilluarparput. Allumut peqataanertik inuusuttuaqqat qanoq isumaqarfigineraat apeqqutigigaangatsigu, oqaatigisarpaat efterskolernerminnik naammassisaqarnerminnut Allu pissutaasimasoq, Peqatigiiffik Kalaallit Meeraertaanni suliniummi pisortaq Naja Eriksson KNR-imut oqarpoq nangillunilu:
- Tamannarpiarlumi anguniagaraarput: Inuusuttuaqqat efterskolernerminnik naammassisaqarnissaannut Allu aqqutigalugu tapersersorusuppagut. Atuarnertimmi iluaqutigilluarsinnaavaat aammalu ilinniaqqinnissaminnut atorluarsinnaallugu, Naja Eriksson taama oqarpoq.
Inuusuttuaqqat kajumissutsiminnillu suleqataasut amerlanerusut
Peqatigiiffiup Kalaallit Meerartaata inuusuttuaqqat 60-it ukioq manna Allumut peqataatikkusuppai, inuusuttuaqqallu attaveqarfigisinnaanissaat peqatigiiffiup neriuutigaa, Allu pillugu, qanorlu nuannertiginersoq inuusuttuaqqanut oqaluttuarerusukkamiuk.
- Amerlanerit peqataarusuttupilussuusarput angerlarsimaffimmit aallaqqanerminni kalaaleqatiminnut attaveqarusuttarlutik, - Allup periarfissaanerata amerlanerusunit ilisimaneqalernissaa pikkoriffiginerusariaqaannarparput, Naja Eriksson taama oqarpoq.
Taamaammat peqatigiiffik Facebookimi qupperniliorsimavoq, inuusuttuaqqallu nammineerlutik tassunga ilanngussinnaapput attaveqaqatigiinnilu Allumi susoqartarnera paasisaqarfigisinnaallugu.
Kajumissutsiminnik suleqataasut qulingiluat siorna ukiumi atuarfiusumi attaveqaqatigiit peqataaffigaat, inuusuttuaqqallu ukioq manna amerlanerusut peqataatinniarneqarmata kajumissutsiminnik suleqataasut amerlanerusut pissarsiarinissaat peqatigiiffiup neriuutigaa.
Oqaatsinik Pikkorissarfimmi Sisimiuniittumi efterskolertunut siunnersortip KNR-imut ilisimatitsissutigaa inuusuttuaqqat Danmarkimi efterskolernissaminut aningaasatigut tapiiffigineqartut ukioq manna 267-iusut. Siorna efterskolernissaminnut tapiiffigineqartunit 265-iusunit 51-it efterskolernertik suli naammassinngitsoq angerlaannarsimapput.
Allu pillugu uani paasisaqarnerusinnaavutit.
