Attaveqaatit ajutuunnginnissaat atuisut neriuutigiinnassavaat
Ajutoortoqartillugu sulisussanik piareersimatitsinissaq maanna isumaqatigiinniutigineqarpoq.
- Soorunami suliumajunnaarnissaq pinngitsoortikkusussimagaluarparput, kisianni ilaasortatta amerlanerussuteqartut toqqarsimavaat suliumajunnaassasugut, naammaginagit illuatungerisatta tunniukkusutaat.Teknikerit peqatigiiffiata Attaveqaatit siulittaasuat Jonahtan N. K Petersen oqarpoq.
Teknikerit akissarsiaasa qaffanneqarnissaannik piumasaqaat, Namminersorlutik Oqartussat isumaqatiginninniartarfiannit akuerineqanngimmat suliumajunnaartoqassaaq.
Annertuumik ajutoortoqartillugu teknikerit 14-it piareersimatinneqarnissaat qulakkeerniarneqarpoq, tassani pineqarlutik peqqinnissaqarfimmi, politiini, qatserisartunilu teknikeritut suliaqartut.
Kangilinnguani sakkutooqarfik aamma angallatit umiarsuit timmisartullu radioatigut attaveqaatit suliumajunnaarnermi eqqorneqassanngillat.
- Ilaasortatta ilaat sillimasuussapput, annaassiniartartut, politiit narkorsaqarfiillu attaveqaataat ajunngitsumik ingerlaavartuarnissaat sillimaffigissallugu, Jonathan N. K. Petersen oqarpoq.
Atortorissaarutit ulluinnarni atorneqartartut suliumajunnaartoqarnerani eqqorneqassapput.
Eqqugaasussaassapput inuinnaat suliffeqarfiit nalinginnaasut attaveqaataat, soorlu oqarasuaatit, mobilit, internetsilu aamma suliffeqarfiit akiliutaat attaveqaatillu kabelitogoortut eqqorneqartussaassapput.
KNR-ip radioani tusarnaartartut TV-kkullu isiginnaartartut suliumajunaarnermi eqqugaasinnaapput. KNR TVkkut radiokkullu aallakaatitat ajunngitsumik aallakaatinnneqartarnerinut isumaginnittuusartut teknikerit pingasut Attaaveqaammi ilaasortaapput.
KNR TV KNR-ip avataani toqqaannartumik aallakaatitsisarnerani aallakaatitsinerit ajunngitsunik aallakaatinneqartarnerinut teknikerit pingasut isumaginnittuusarput, suliumajunnaartoqarneranilu teknikkikkut ajutoortoqarpat ajoqutit iluarsaanneqarsinnassanngillat.
