Attartortut 189-it inigisaminnit anisitaasussanngoqqasut

Anisitsinissamik piumasaqaatit 907-it politiinut A/S Inissiaatileqatigiiffik INI-mit ukioq manna qaammatini siullerni qulingiluani nassiunneqarsimasut, INI-p ilisimatitsissutigisimagaa, Knud Kristiansenip akissutaani ilaatigut atuarneqarsinnaavoq, taakkunanngalu 189-it politiinit anisinneqarnissamik utaqqisuusut aamma ilisimatitsissutigineqarluni.

Pisortat inissiaataannit anisitsisarneq Naalakkersuisunit ataavartumik malinnaaffigineqarnersoq Anthon Frederiksenip aamma apeqquteqaatigaa:

AAMMA ATUARUK Inissianik attartortut anisitaasartut suli amerlapput

- Aap. Pisortat inissiaataanni akiitsut akilinngitsuukkat amerlanerat anisitaasartullu amerlanerat Naalakkersuisunit eqqumaffigineqartorujussuuvoq isumakulunnartoqartinneqarlunilu, Knud Kristiansen, akissummini ilaatigut taama allaaserisaqarpoq, attartortulli anisitaannginneranni naafferarlugit akilersuisinnaanissamut isumaqatigiissusiorfiginiarneqaqqaartartut, anisitaasartut sapinngisamik amerlavallaannginnissaat anguniagaalluni.

- Attartortut akilinngitsuukkaminnik akiitsoqartut najugaqarfiit aningaasaqarneranni amikkisaarnerujussuannik kinguneqartarput. Nammaqatigiinnissamik tunngaveqarnerup nassatarisaanik attartortut piffissaq eqqorlugu akiliisartut attartortut akiliisinnaassuseqanngitsut imaluunniit akiliinissamut piumassuseqanngitsut aningaasartuutinit akiligassaasa ilaannik akiliisarput, Ineqarnermut Naalakkersuisoq Knud Kristiansen, Anthon Frederiksenimut ilaatigut taama akissuteqarpoq.