Inissianik attartortut anisitaasartut suli amerlapput

Partii Naleraq sinnerlugu Inatsisartunut ilaasortap, Anthon Frederiksenip paragraf 37 naapertorlugu apeqquteqaatigaa inissianik attartortut qassit anisitaasarsimanersut.

Naalakkersuisunilu akineqarpoq, siorna 2014-mi akiligassaqanernertik pissutigalugu anisitaasut katillugit 139-usimasut. Allat siorna anisitaasut tallimat, tassaasimapput inigisaminnik paarsinerlussimasutut anisinneqartut.

AAMMA ATUARUK Ineqarnermut akiliutinik kinguaattooruteqartut kingunerlutsitserujussuartut

Anisitaasimasut kommunit inissiaataanni aamma Namminersorlutik Oqartussat inissaataanni najugaqartuupput. Inissiaatileqatigiiffimmit Illuummit anisitaasoqarsimanngitsoq, Naalakkersuisut allapput.

Ukiormanna amerlanerujussuupput

Ukioq manna, tassa 2015-mi anisitaasussat siornamut naleqqiullugit suli amerlanerusussaapput, tassa inissianik attartortut 398-it akiliisimannginnertik pillugu anisinneqarnissaat, Naalakkersuisunit naatsorsuutigineqarmat.

Anisitaasussat amerlanerpaartaat Narsami najugaqarput, tassani 89-it anisitaanissartik naatsorsuutigisinnaagaat Oqartussat allapput. Nuummiut anisitaasussat 50-ullutik.

AAMMA ATUARUK Ineqarnermut akiliutinik akiliinngitsoorsimasut 90-it anisitaasut

Anthon Frederiksenip aamma apeqqutigaa, taama anisitsisarneq inuiaqatigiinnut qanoq akissaajaataasartiginersoq.

Tamanna pillugu A/S INI allappoq, tamassuma qanoq akissaajaataasarnera naatsorsoruminaatsoq, oqarlutik sumiiffinni inissianik sullissisut assigiinngitsunik akissarsiaqartitaasarneri aamma qassit anisitaasarneri apeqqutaallutik aningaasartuutit assigiinneq ajormata.