Attartortut 180-it anisitaariaannaapput
Inissiaatileqatigiiffiup attartortui 500-it missaaniittut januaarip naanerani anisinneqarnissamminut ulorianartorsiorput. Taakkunannga attartortut 180-it akiitsuminnut akiliuteqarnissaminnut suliniuteqarsimanngitsut anisinneqarnissaat politiinut suliakkiutigineqaqqammerput. Akiitsoqalertarnerallu assigiinngitsorpassuarnik patsiseqartarpoq:
- Ilaatigut immaqa akiliiniarnermut ajornartorsiuteqarneq nalinginnaasumik inunni taakkunani pilersarpoq. Soorlu akiligassanik allanik pingaartitsineruneq peqqutaasinnaavoq aamma peqqutaasinnaavoq inoqatigiit ilaannai immaqa inissiamut tassunga akilersuisarmata ilaalu akilersueqataanatik. Taamaalillutik inuuttoortarlutik akiliutissaminnut, Birthe Kielsen, A/S Inissiaatileqatigiiffik INI-mi sullissinermut pisortaq oqarpoq. Taassumali aamma suliffissaarukkallarneq akiliinngitsoortarnermut patsisaartunut ilaanerarpaa:
- Aamma una peqqutaasarpoq ineqarnermut tapiissummik qinnuteqaraangamik, soorlu ukiut marluk imaluunniit ataatsip siornatigut isertitarisimasat najoqqutaralugit qinnuteqaat suliarineqartarmat. Taamaalilluni immaqa aningaasarsiaqarluarsimalaaraanni taamanikkut, massakkulli immaqa suliffissaarunneq peqqutigalugu aningaasarsiaqarpiarnani - isertitaqarpiarnani. Taava akiligassaq taamaalilluni pilersinnaasarpoq, Birthe Kielsen oqarpoq.
Inissianik attartortut 180-it anisinneqarnissaannut politiinut suliassaq ingerlatinneqarpoq. Attartortulli akiliinissaminnut sapaatip akunnerini pingasuni politiinit periarfissinneqaqqittarput, aammalu:
- Taava aamma tassunga ilutigitillugu kommuneqarfinni isumaginnittoqarfiit attaveqarfigineqartarput. Tassani misissorneqartarput kikkut akiitsuminnut ikiorsiiffigineqarnissaminnut periarfissaqarnersut. Taakkua aamma akiliunneqarsinnaasarput inigisaminniiginnarallarsinnaasarlutillu, Birthe Kielsen oqarpoq.
