Atortoq akisooq annaagaat

Ilisimasassarsiornermut atortut 150.000 koruuninik nalillit, umiarsuarmi Galathea 3-miittut, Narsap Saavani immamut ippassaq annaaneqarput, 270 meterisut ititigisumut kivimmata.

Danmarkimi aviisi Berlingske Tidende ullumi taama allappoq.

Vaajari sisak kittorarmat, ruujori 12 meterisut takitigisoq, vaajarimullu ikkusimasoq, annaaneqarpoq. Ruujori immap naqqanut marrarmut magguppoq, taamaattussaagamimi.

Ajornartorsiulli tassaavoq qillerinikkut qaqitassanut ruujori atugassaasimagaluarmat. Vaajareqartinnagu ruujori qaqinneqarsinnaanngilaq.

Vaajari kittorarmat inunnik ajoqusertoqarsimasinnaagaluarpoq, qujanartumilli ajoqusertoqarani.

- Vaajarimik amoorut ajoquteqarsimagunarpoq, kissattorujussuusimavormi, umiarsuup naalagaata tullia, Martin Sort Mikkelsen oqarpoq.

Avatangiisip silaannaallu allanngoriartornerata kingunerisinnaasai Galathea 3-p misissuiffigisussaavai, misissugassallu immap naqqaaneersut misissugassanut ilaasussaagaluarlutik.

Galathea 3-p angalanerani siuttup, Minik Rosingip, oqarpoq atortunik annaasaqarneq ilisimasassarsiornermik kinguaattoortitsinavianngitsoq.