Atornerluisarneq pillugu Qaanaami oqalugiarneq pissarsiffiulluartoq
Killiliisami maligassiueqataasoq, Heidi Møller Isaksen kinguaassiutitigut atornerluisarneq pillugu nammineq inutttut nalaatani pillugit saqqummiimmat soqutigineqarluarpoq.
- Ilimagisannik ingerlalluarnerujussuuvoq, tuppallernarlunilu pikkunarpoq, angusaqarluartutullu misigivunga, maligassiueqataasoq Heidi Møller Isaksen oqarpoq.
Kinguaassiutitigut atornerluisarneq pillugu Heidi Møller Isaksen marloriarluni sapaatip akunnerata siuliani oqalugiarmat qaanaarmiut 30-t missaanniittut peqataapput.
AAMMA ATUARUK Killiliisap kinguaassiutitigut atornerluisarnerit unitsissagai
Tusarnaariat inuttut namminneq tarrarsorfissarsillutik misigisimapput. Heidillu misigisaminik oqaluttuarnera naapertorlugu tusarnaariaq ataaseq pissarsilluarsimasoq immikkut maluginiarsimavaa:
- Aappassaannik saqqummiillunga takkuteqqikkami sanngiinnani nukissaqarnerullunilu takkuppoq, soorlu oqalugiarninni saqqumiussakka pillugit inuttut nammineq tarrarsorfigai, Heidi Møller Isaksen oqarpoq nangillunilu:
Peqataasut ilaat pissarsiaqarluarsimasoq qujamasuttupilussuuvoq, soorlu arnaq una misigisimasaminik oqaluttuarnissaminut sapinngikkuni taava uanga aamma sapinngilanga saqqummiisinnaallungalu. Oqalugiarnermi arnat angutillu arlallit qangali qamaniittormiorisaminnik annissuipput, soorlu aamma angut 70-inik ukiulik oqaluttuarluni sassarpoq, taamaattumik soqutiginnittoqarluarpoq.
AAMMA ATUARUK Tillie vil have meget større beløb til Killiliisa
Atornerluineq nipangiunneqassanngitsoq
Kinguaassiutitigut atornerluisarneq nipangiunnagu ammasumik eqqartorneqartariaqarpoq, Heidi Møller Isaksenilu oqalugiarami tusarnaariat oqiliallassimaarlutik pissarsilluarsimapput. Kinguaassiutitigulu atornerluisarneq nipangiutiinnarnagu ammasumik eqqartuinissaq Heidimit kaammattuutigineqarpoq.
- Angajoqqaat taamatut nalaataqarsimasut pillugit ammasumik saqqummiunnissaa kanngunanngilaq, nipangiussinerli kanngunarnerpaajuvoq - meerarlu ikiornagu, kinguaassiutitigullu atornerluisarneq paquminartutut isigalugu kanngunarnerpaavoq, Heidi oqarpoq nangillunilu:
Oqalugiarninni malunnarpoq tusarnaariat nukissanik tunineqarlutik misigisut, saqqummiineralu pillugu uannut qujassuteqarlutik aamma takusinnaavakka isaat qiimanerullutik oqiliallassimasut, maligassiueqataasoq, Heidi Møller Isaksen oqarpoq.
Kinguaassiutitigut atornerluisarnerup ammasumik eqqartornissaa akiorneqarnissaalu anguniarlugit qaanaarmiut suleqatigiissaaliorniarput.
