Atornerluinerit qanganitsertarnerat atorunnaarsikkusuppaat

Kinguaassiuutitigut atornerluineq atornerluineruvoq. Atornerlunneqarsimasup atornerlugaasimanini misigissutsimigut qanganitsertissinnaanngilaa, taamaattumik inatsisitigut suliassanngortitsiniarnermi atornerluisimaneq qanganitsinngisaannarnissaanik isumaq tapersersorparput, suliniaqatigiiffiup Nanu Børnip siulittaasua Krissie Broberg oqarpoq.

- Kinguaassiuutitigut atornerlunneqarsimasut atornerlunneqarnerminnit ukiut amerlasuut qaangiutereersut eqqartuussissutitigut suliassanngortitsinermi uppernarsaatinik amigaateqarneq pissutigalugu amerlasuut ajorsarnissaanik oqaluttut ilisimaarivakka, taamaalillutik innarlerneqarnerat marloriaammik misigisariaqartarlugu. Pingaarutilerujussuarmik atorneqarsinnaasumik peqarpoq, tassalu nipituumik tamassuma oqaatiginissaa pisariaqarpoq, Krissie Broberg oqarpoq.

- Atornerlugaasimasoq atornerlugaasimanini pillugu ammarpat taannalu ikiorneqarsinnaanngippat ajornartorsiut marloriaatinngussaaq, Krissie Broberg oqarpoq.
Kinguaassiuutitigut atornerluisarneq killissaa tikillugu oqaluuserineqartariarpoq, nipangiusimaannarnagu, Suliniaqatigiiffiup Nanu Børnip siulittaasua isumaqarpoq.
Misigissutsikkut misigisimasaq sivisuumik atorneqarsimatillugu nipituumik oqaatigigaanni misigissutsikkut suliaq aallartittakkajuttarpoq.

Atornerluinerit qanganitsertarnerisa atorunnaarsinnneqarnissaat kinguaassiutitigut innarlerneqarsimasunut nuna tamakkerlugu ikorfartoqatigiiffiup Tasiortap isumaqatigaa.

- Atornerluisarnerup saqquminerusumik oqaluuserisalernissaanut pingaaruteqarpoq, Tasiortap siulittaasua Arnaq Grønvold oqarpoq.  

Taassuma erseqqissarpaa, tamanit pingaarnerusoq tassaammat atornerlugaasimasut katsorsartinnissaat, siunnersorneqarnermikkut aqqutissiuunneqarnermikkut  ikorfartoqatigiinniluunniit peqataanermikkut.