Atornerlugaasimasoq: Atornerluineq qanganitsersinnaasariaqanngilaq

Kinguaassiuutitigut atornerlunneqarsimagaanni unnerluussinissamut periarfissat qanganitsersinnaasariaqanngillat, atornerluisimasullu eqqartuussivimmut qaqugukkulluunniit tunniunneqarsinnaasariaqarlutik. Astrid Fleischer Rex, Demokraatineersoq taama siunnersuuteqarpoq.
Laila Kristiansenilu isumaqataalluni ilaatigut ima oqarpoq:

- Kinaluunniit meeraq angajoqqaaminik unnerluussinavianngilaq, ajornartorsiutigilersimasani inersimasunngoraangami aamma aatsaat suliarinialeraangamigit tamakku qaqilertaramigit. Oqartoqarsinnaanngilaq ajornartorsiutit taakku qaqugu qaqilerneqassanersut, Laila Kristiansen oqarpoq.

"....tallimanngornerummanaasiit ilunni eqqissiveqannginneq takkuteqqippoq, aasiit taamatut, uummatikkut anniarneq, aliasunneq, kamanneq, ersineq, paatsiveeruteqqajaaneq(...)ilami allaannginnami ilunni qatsortitassaanngivissumik anorersuartorsuaq...".
Laila Kristiansen atuakkiamini "Malersortinneq"-mi 2001-imi saqqummersinneqartumi ilaatigut taama allappoq.

Atuagaq kinguaassiuutitigut atornerluinermik oqaluttualiaavoq, Inuttullu inerikkiartorneq pillugu atuartitsinermi anguniagassat pillugit taamanikkut Namminersornerullutik Oqartussat 2004-mi nalunaarusiaanni ilaatinneqarpoq, ilikkagassatut anguniagassat aamma atuartitsinissamut, naliliinissamut atortussatullu siunnersuutinut ilaalluni.

Imminut suliariniarluni siumullu ingerlariaqqinnissani pillugu Laila Kristiansen atuakkiorpoq. Sulialli ingerlarnga ajornaatsuinnaasimanngilaq, allaallumi politiinit killisiorneqarnermini salluliortariaqarsimalluni:

- Ilaquttakka illersorniarlugit, imminullu illersorniarlungasalluliortuuleraluarpunga, oqarpoq.

Sooruna taamaalisutit?

- Uanga nammineerlunga unnerluutiginianngikkaluarakku. Eqqarsarama "uanga nammineq ingerlaqqiinnassuunga, ajunngilaq taanna ajortumik pineqanngikkaluaruni qimareerpakka", kisianni taamaanngilaq. Misigissutsima malersortuarsinnarpaanga, eqqarsarpungalu ilumoortoq saqqummersinneqartariaqartoq, Laila Kristiansen oqarpoq.

Laila Kristiansen uersagaavoq, aanaakkumini aataakkuminilu najugaqaqqaariarluni, anaanaminut ataatarsiaminullu ukiualunnguit qaangiummata kingorna nuulluni. Meeranerminiit inuusuttuaranngornissami tungaanut ataatarsiaminit atornerlugaasarsimavoq, imminullu suliarilernikuugaluarluni suliaq suli naammassinngilaq:

- Ulloqartarpunga nukittoorujussuullunga, ulloqartarpungalu soorlu nukissaarutipajaaqqallunga.  Misigissutsit taakku utertuartuupput, immaqalu apeqqutaasarpoq suut nalaannerlugit. Imminut suliarinikuusorujussuuvunga, eqqartoraangakkulu qiassaarnikuullunga, kisianni suli suliassarpassuaqarlunga nalunngilara, meeranerminiit inuusuttuaranngornissami tungaanut kinguaassiuutitigut atornerlugaasimasoq Laila Kristiansen oqarpoq.
Atornerluisoq pineqaatissinneqarsimasut inissiisarfiannut inissinneqartussatut pineqaatissinneqanngilaq, akiliisinneqarlunili.