Atorfinittussanik mattussinerup kommuunit ajornartorsiortilereerpai
Ilinniartitsisut kattuffiannit, IMAK-imit ersarissumik oqaatigineqarpoq, mattussineq ingerlaannassasoq isumaqatigiittoqarnissaata tungaanut. Isumaqatigiinniarnerit qaqugu ingerlaqqilersinnaanersut suli oqaatigisinnaanngimmat. Taamaammat kommunit ilinniartitsisunik qaqugu atorfinitsitsisinnaalissanerlutik aamma ilisimanngilaat.
- Maannakkorpiaq ima sunniuteqarpoq, ukiup tullissaanut piareersarnissatsinnik ingerlatsinissarput kinguaraluttuinnarluni, taamaattumillu iluamik aallartissinnaanata. Kisiannili inuttassarsiuinissatsinnut piareeqqavugut, mattussinerlu taamaatinneqariarpat inuttassarsiuilluta aallartissaagut, Kommune Kujallermi atuarfeqarfinni paaqqinnittarfinnilu pisortaq, Jens Korniliussen oqarpoq.
Ilinniartitsisut kommunenut allanut nuunnissaminnik pilersaaruteqareersut aamma mattussaasunut ilaammata, Kommune Kujallermi ilinniartitsisut qasserpiaat amigaatigineqalerumaarnersut, Jens Korniliussenip oqaatigisinnaanngikkallarnerarpaa.
- Ilinniartitsisut qaangiuttoorneqarlutik sulisarneri eqqarsaatigalugit, ilinniartitsisunik 15-init missaanniittunik kommunerput amigaateqassagaluarpoq, Jens Korniliussen naliliivoq.
Kommuneqarfik Sermersuumit aamma Qeqqata Kommuneanit ilinniartitsisut qassit amigaataalissanersut oqaatigineqarsinnaanngikkallarpoq, tassami ilinniartitsisut qasserpiaat atorfissaqartinneqarumaarnersut ilisimatinnagu pilersaarusiorneq ajornakusuussasoq kinguartittariaqassasorlu oqaatigalugu.
- Aggustip aallaqqaataa nallertinnagu ilinniartitsisunik mattussineq taamaatinneqarsimanngippat ajornartorsiutit takkussulissapput, Kommuneqarfik Sermersuumi Atuarfeqarnermut Immikkoortoqarfimmi pisortaq, Hans Peter Broberg oqarpoq.
Ukioq atuarfiusoq aallartikkaagat Kommuneqarfik Sermersuumit ilinniartitsisut 35-it missaanniittut atorfinitsinneqareersartut, Hans Peter Brobergip oqaatigaa ukioq mannalu taama amerlatigisut atorfinitsinneqarnissaat naatsorsuutigineqartoq unnerlugu.
Qeqqata Kommuneani ilinniartitsisut tallimat missaanniittut amigaataalerumaartussaasut, kommunip ilinniartitaanermut allattoqarfiata pisortaata, Axel Lund Olsenip oqaatigaa.
Ilinniartitsisunik atorfinikussuttunik mattussineq atuutsillugu, kommunit allatut iliorsinnaanngillat, taamaallaat sulisussarsiornissamut allagartaliussassat piareersimatiinnarsinnaallugit.
- Kommunit Kattuffiannit peqquneqarnerput malillugu, atorfiit mattunneqarnikuusut inuttalersortussaanngilagut, taamaaliussagaluaruttami aaqqiangiinnginneq sakkortusiartortiinnassagatsigum, Kommune Kujallermi atuarfeqarfinni paaqqinnittarfinnilu pisortaq, Jens Korniliussen oqarpoq.
IMAK-ip ilinniartitsisunik atorfinittussanik mattussinera Qaasuitsup Kommuneanut qanoq sunniuteqassanersoq suli oqaatigineqarsinnaanngikkallartoq, kommunip atuarfeqarfiinut ingerlatsiviani pisortaq, Hans Eriksen KNR-imut oqarpoq.
