Atorfinitsitsiniartartut: Suliffissarsiortut qimarratilissapput
- Suliffissaqartitsissagaanni aamma inissaqartitsineq allaqqunneqarsinnaanngilaq.
Tassami nunamit allamit maanga tikikkaanni ineqarnissaq pingaaruteqarpoq,
Aamma maani najugallit inissiamik pisinissaminnut akissallit namminneq pisisarput, kisianni naammattunik aningaasaateqanngitsut suliffimmit inissaqarnissaat pingaaruteqarpoq, Greenland Headhuntingimi pisortaq Teddy Sølvberg oqarpoq, nangillunilu
- Suliffimmi sulisussarsioraanni inissaqartitsisoqaranilu suliffeqarfiup amerlanngitsunik qinnuteqarfigineqarnissani naatsorsuutigissavaa, taamaattumik Namminersorlutik Oqartussat sulilersussanut inissiaateqannginnamik suliffimmut naleqquttunik sulerusuttunik qinnuteqarfigineqangaarnavianngillat, aamma oqarpoq inissaqarnissaq akissarsianinngaanniit pingaartinneqarnerusartoq.
- Suliffimmi sulilerusulluni qinnuteqartut akissarsiat qanoq amerlassuseqarnissaat apeqqutigineq ajorpaat, suliffigisassaminnulli atasumik inissaqarnerlutik apereqqaartarput,
Teddy Sølvberg oqarpoq. Aamma Danmarkimit nunatsinnut suliartortussanik sullissisartunit NextJobGreenlandimit inissaqartitsinnginneq isorineqarpoq. Tassani piginneqataasoq Peter Rasmussen ima oqarpoq,
- Atorfininnermut atatillugu inissaqartitsisarunnaarneq inuit initaarnissaannik kaammattuineq, pitsaasumik eqqarsaataagaluarluni atorsinnaanngilluinnarpoq, Danmarkimi najugallit atorfinissallutik Nuummukartut inissaqartinneqanngikkunik tikissinnaanngillat, Nuummi inissarsiortoqarsinnaavoq imaaliallaannarli inissamik nassaarnissaq ajornakusoorpoq, Peter Rasmussen oqarpoq, aamma oqarpoq inuit suliartorlutik Nuummut tikittut akunnittarfimmi najugaqarsinnaanngitsut.
- Inuit Kalaallit Nunaanni atorfinikkusullutik uagutsinnut saaffiginnikkaangamik atorfimmut atasumik inissaqartitsisoqarnera apeqqutigeqqaartarpaat. Aamma meeqqat ulluunerani paaqqinnittarfimmiissinnaanerat pingaartinneqartarpoq.
Sinerissamit nunanilluunniit allanit Nuummut suliartorlutik tikittut atorfimminnut atasumik inissaqartinneqanngikkunik Nuummi mittarfimmut tikikkunik tarfiinnarsinnaanngillat, aamma ukiuni marlunni pingasuniluunniit suliartorlutik tikittut akunnittarfimmi najugaqaannarsinnaanngillat, NextJobGreenlandimi piginneqataasoq Peter Rasmussen oqarpoq.
