Atorfinitsitsinermut toriitsumut akissut kingusissoq
Carsten Frank Hansen aningaasaqarnermut nunamilu namminermi pissutsinut naalakkersuisoqarfimmi pisortatut ulluni arlaqanngitsuinnarni sulivoq, pisussaatitaaffimminimmi sumiginnaasimasutut unnerluutigineqarnini suli naammassillugu suliarineqanngitsoq pissutigalugu soraartariaqalerami. Tamanna kukkuluttorneruvoq, atorfinitsitsinermut ataatsimiititaliaq Carsten Frank Hansenip sulisitsorisimasaanut kingullermut Greentop Greenlandimut paasissutissanik pissarsiniaaqqaarsimagaluarpat pinngitsoorneqarsimasinnaagaluartoq.
Pineqartoq pillugu Demokraatit siulittaasuat Jens B. Frederiksen siorna septembarip 23-annili paragraf 37 najoqqutaralugu apeqquteqaateqarpoq. Maanna akissuteqartoqarpoq. Ullunik qulinik akissuteqarnissamut piffissaliunneqartoq qaangingaatsiaqalugu akissuteqartoqarluni.
Demokraatit siulittaasuata paaserusutaa tassaalluni, Ramsdalip, atorfiup inuttassarsiorneqarneranut isumaginnittuusup, Greentop Greenlandimit paasissutissanik pissarsiniarsimannginnera, atorfinitsitsinermut ataatsimiititaliamit, Naalakkersuisoqarfimmi pisortamit Svend Hardenbergimit siulittaasuuffigineqartumit qanoq ililliuni arajutsineqarsimanersoq.
- Ataatsimiititaliap naammattutut isumaqarfigisaanik, Ramsdal paasissutissarpassuarnik pissarsisimavoq. Greentop Greenland taakkununnga ilaanngimmat ilumoorpoq, kisiannili ataatsimiititaliap tamanna amigaataasutut isigisimanngilaa, Naalakkersuisuni ilaasortaq Vittus Qujaukitsoq allappoq.
Tassuma akissummini nassuiaatigaa, Carsten Frank Hansenip suliffigisarsimasaani Greentop Greenlandimi pisortaasimanera sivikitsuinnaasimasoq, naallu taassuma pisortatut atorfigisimasaani kisiartaagaluartoq kingullertullu atorfigisimagaluaraa, pingaaruteqanngitsutut nalilerneqarsimasoq.
- Aningaaserinermik suliaqartunit paasissutissat ataatsimiititaliap pingaarnertut nalilersimagai, Vittus Qujaukitsoq allappoq, matumanilu innersuussutigalugit Carsten Frank Hansen Andelskassen Fynimi aningaaserivimmi sulisimanera aamma immikkoortortami pisortaasimanera.
