Atomit eqqagassartai ukiuni 100.000-ni sermimiissinnaassanersut paasiniarpaat
Nunap qeriuaannartup iluata ernga tarajortaqarnermik eqqakkanut radioaktiviusunik qinngornilinnut poorineqartartut kanngussanik sanaat arrortissinnaassagaat ernummatigineqarpoq, ingeniøren.dk taama allappoq.
Atomip nukinga atorlugu nukissiorfinniit eqqagassat isumannaannerusumik toqqorneqartarniassammata paasisaqarnerorusullutik sermersuup killingani qillerissapput. Eqqakkat ulorianarnersaat ukiuni 100.000-ini isumannaatsumik toqqortarineqarsinnaasussaassapput. Siunissamilu qaninnermi ungasinnerusumiluunniit nutaamik sermersuaqaqqilernissaanut toqqorsiviit atasinnaassariaqarput.
Toqqorsiviillu ataneqqortussusaat misissorniaraanni nunatta sermersuani misissuisoqartariaqarpoq. Taamaammat svenskit, Finlandimiut Canadamiullu pisortaat GEUS - Danmarkimi Kalaallit Nunaannilu ujarassiuutut misissuiffik - suleqatigalugu ingerlatsiviliorniarput, Greenland Analogue Project-imik - GAP - taaguutilimmik.
GAP Kangerlussuarmit 20 km-sut ungasitsigisumi 750 metrisut ititigisumut ukioq manna qillerissapput.
Qilleriffik nunami, Kangerlussuarmit aqquserngup naaffiani, sermersuup killingani aallartissaaq. Tamaanngaanniit uingasumik sermersuup iluanut qillerisoqassaaq, tassanngaanniillu nunap iluata erngata sananeqaataa ilisimatusartunit misissorneqassaaq.
Danskit ilisimatusarnermut ministeriata Charlotte Sahl-Madsenip, silap pissusaanut ministeri Lykke Friis Naalakkersuisunullu ilaasortaq Palle Christiansen ilagalugit, sapaatip akunnerani uani nunatsinniinnerminni misissuiffik alakkassavaat, Sermersuarmittaaq paasiniaaffik NEEM alakkassavaat.
