Atlantikup Avannaani Suleqatigiit ataatsimiititsiniarput
Atlantikup Avannaani Suleqatigiit Ålborgimi Århusimilu Kalaallit Savalimmiormiullu illuini, sisamanngorpat tallimanngorpallu ataatsimiititsiniarput. Ataatsimiinnerni kalaallit savalimmiormiullu Danmarkimi najugaqartut soqutigisaat sammineqarniarput.
Allattoq Elisa Isaksen
Kalaallit Folketingimi ilaasortaatitaasa aappaat, Sofia Rossen, Juliane Henningsenip erninerminut atatillugu sulinngiffeqarnerani paarlattaasoq, aamma Savalimmiormiut ilaasortaatitaasa aappaat, Høgni Hoydal, ataatsimiinnerni peqataassapput.
Ataatsimiigiartut Danmarkimi atukkatik Folketingimi ilaasortanut oqaluttuarisinnaavaat, aamma naalakkersuinikkut suliniutigineqartariaqartutut isigisatik saqqummiussinnaallugit.
Høgni Hoydalip aamma Sofia Rossenip Folketingimi sulinerminni atorsinnaasaminnik isumassarsisinneqarnissartik neriuutigigaat, tusagassiuutinut nalunaarumminni allapput.