Atlantikup avannaamiut Odensemi juullimut niuffatsitsilersut
Nordatlantisk Hus atlantikup avannaamiut ulluni marlunni juullimut niuffatsitsinissaannut qaaqqusivoq. Tuniniaasullu atlantikup avannaaneersut imaaginnavissapput, ukioq mannami tuniniaaviit 35-nit amerlanerussapput - aatsaallu taama amerlatigissallutik. Nordatlantisk Hus nutaarsiassaatimini taama allaaserisaqarpoq.
Sapaatit-akunnerata naanerani Odensemiissaguit juullimut tunissutissanik allami pissarsiarineqarsinnaanngitsunik pisinissannut periarfissaqassaatit. Soorlu assersuutigalugit puisip amianik aaqqatit, umimmaap qiviuinik islandimiut/savalimmiormiullu savaasa qiviuinik qilattakkat, juullimi pinnersaatit nammineq suliat, juullip inui islandimiorpaluttut, puisip aalisakkallu amiinik taskiliat, pinnersaatit, allarpassuillu. Pisiassat tamarmik atlantikup avannaa isumassarsiorfigalugu suliaapput.
Qaatiguumik akitsorterussineq outlettinillu tuniniaaneq
Nordatlantisk Husimi pisiniarfik juullimut niuffatsitsinissamut aamma pisiortorluarsimavoq, tassungalu atatillugu atisanik Isaksen Designimeersunik, pinnersaatinik allanillu outletitut tuniniaasoqassaaq.
Immikkullu illuinnartumik aamma puisip amianik qaatiguuliamik sapaatiuppat nalunaaqutaq 14.00 akitsorterussisoqassaaq.
Akitsorterussinermi sinneqartoorutigineqartut Kalaallit Illuutaata ikiuiniarnermut aningaasaateqarfianut tunniunneqassapput. Qaatigooq Ulla Aagaard Schmidtimit tunissutaavoq.
Savalimmiormiut nipilersortartut Anna Maria aamma Bjarki nipilersussapput, aamma erinarsoqatigiit tusarnaartitsissapput. Taakkulu arfininngornermi sapaammilu nal. 15 pissapput, Restaurant Nordatlantenimilu gløggimik allanillu juullisunnitsunik tuniniaasoqarumaarpoq.
Aaqqissuussineq arfininngorpat novembarip 26-ani aallartissaaq, nal. 11.00-17.00, sapaammilu novembarip 27-ani nanginneqassaluni, nal. 11.00-17.00.
Iserneq akeqanngilaq.
Qaatigooq akitsorterunneqartussaq.
