Atlantikup avannaamiut Københavnip Strøgiani juullimi tusarnaartitsilersut

Erinarsoqatigiit atlantikup avannaamiut Københavnimi Helligåndskirkemi naapeqatigiillutik erinarsoqatigiittarnerat ukiorpassuarni ileqqorineqarpoq. Ukiormannalu aamma taamaaliortoqassaaq. Erinarsoqatigiit Kalaallit Nunaanneersut, Savalimmiuneersut Islandimeersullu arfininngorpat decembarip arfineq-pingajuani oqaluffimmi nal. 17.00 tusarnaartitsissapput.
Allattoq Peter Troelsen, Simon Uldum
decembarip 06-at 2012 09:50

Nunanit peqataasunit tamanit erinarsoqatigiit marluk tusarnaartitsissapput, tusarnaariallu Kalaallit Nunaannit, Savalimmiunit Islandimiillu juullisiutinik tussiutinillu tusarnaagassaqassapput. Erinarsoqatigiit arfiniliusut pattattartumit Stefán Arasonimit ingiorneqassapput.

Erinarsoqatigiit peqataasussat tassaapput Húsakoríð aamma Mpiri Savalimmiuneersut, Islandip erinarsoqatigiivi arnat aamma STAKA Islandimeersut aammalu erinarsoqatigiit MIK aamma AAVAAT Nunatsinneersut. Erinarsoqatigiit arfiniliusut nunaminnit erinarsuutit erinarsornerisa saniatigut aamma ataatsimoorlutik erinartuutit marluk erinarsussavaat, tassanilu aamma tusarnaariat erinarsoqataanissaminnut periarfissaqassapput.
Tusarnaartitsineq Kalaallit Illuanit Savalimmiormiut Illuat Islandimiullu pisorsarsimassutsikkut illuat suleqatigalugit aaqqissuunneqartoq kalaallit juullimi unnersiutiginnissutaannik ”Gûterput”-mik erinarsoqatigiinnit tamanit tusarnaariallu peqatigalugit naggaserneqassaaq.

Iserneq 100 kr.-eqassaaq, tusarnaariallu piffissaagallartillugu takkunnissaat kajumissaarutigineqarpoq tusarnaartitsinermut isissutissat nunguttuaannarneri misilittagaqarfigineqarmat. Aaqqissuisut pingasuusut aamma isissutissanik nammineerlutikq tuniniaasuussapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq