Atlantikukkoornermut akitsuusersuinermut akerliusoq
Nunatsinniit nunatsinnullu angalanerit akitsuusernerisigut mittarfiit amigartoorutaasa matussuserniarneri isumatusaarnerunngilaq.
Kalaallit Airports siulersuisuinut siulittaasoq, Johannus Egholm Hansen, taama isumaqarpoq. Akitsuusiinermi akinut qaffaataassaaq.
Atlantikukkoornermut akitsuusersuinerup aningaasat kaaviiaatitat ilaasullu Kalaallit Airportsip sullitai ikilisissavai.
Akitsuusersuiniarnerit mittarfiliortitsinernut matussusiisussatut Naalakkersuisunit isumassarsiaavoq, ukiup aallartinnerani tusarniaassutigineqarluni. Mittarfiliortiterinerit qaangiuppata atlantikukkoornermut akitsuut mittarfeqarfiit amigartoorutaannut matussutaasussaavoq.
Mittarfiliortitsinermi isumaanut ilaavoq, takornariat amerliniassammata angallannerup akikillinissaa, atlantikukkoornermulli akitsuutip tamanna mumisissaagaa, Johannus Egholm Hansen oqarpoq.
- Suulluunniit akia qaffakkukku pisisukinnerulertarpoq.
AAMMA ATUARUK Nutaanik mittarfittaarnikkut CO2-mik aniatitsineq millisinneqassaaq
Tamannalu mittarfiliortitsinerup isumaanut naapertuutinngitsoq, siulittaasoq oqarpoq.
- Akit appartussaallugit qaffakkaanni imminut ataqatigiinngilaq. Siornatigut eqqaasatsitut tassa taanna siunertaq qimallugu muminneruvoq.
Billetsit akii qaffappata ilaasullu ikilippata aningaasaqarnerup ajorseriarnissaa, Kalaallit Airportsip aamma ernumassutigaa. Taamaalippammi aningaasanik mittarfiliortiternermi atugassanik atorniarnissaq ajornarnerulissaaq.
Johannus Egholm Hansen oqarportaaq angallannermi sukkoortunut akitsuusersorniarneqarnersut ersernerluttoq. Nuuk Københavnillu akornanni kisiat pineqarnersoq immaqaluunniit assersuutigalugu Island Kulusullu akornanni aamma pineqarnersoq.
AAMMA ATUARUK Mittarfiit amigartoorutaat akitsuusersuinikkut aningaasalersorneqassapput
Taamaammat akitsuusiinnginnermi tssunga tunngasut ersarinnerulersinnissaat akitsuummullu sunniutaasussat nalilersornissaat, suliffeqarfiup inassutigaa.
Air Greenland aamma Visit Greenland atlantikukkoornermut akitsuut eqqarsarnartoqartillugu oqaatiginikuuaat, isumaqaramik ilaasukinnerulernermik kinguneqassasoq.
Kalaallit Airports isumaqarput Mittarfeqarfiit amigartoorutaat, Kalaallit Airportsip isertitariumaagaannik matussuserneqarsinnaasut, akitsuullu pisariaqanngitsoq.
