Qallunaatsiaat atisaat Nanortallip eqqaani qallunaatsiaqarfimmi kujallermi Herjolfnæsip oqaluffikuani 1921-mi nassaarineqartut maanna nunatsinnukaanneqalerput.
Atisat taakku alapernaarsuutip Ejnar Mikkelsenip Danmarkimi Skagenimiit nunatsinnukaappai, ippassaanilu aallarluni.
Atisat pineqartut arfineq-marluupput - ilaatigut tassaallutik kjoleq takisuunik talilik, nasaq, alerseq inersimasullu nasaviutaa - taakkulu tamarmik ukioq 1250-ip 1400-illu akornanni atisarineqarsimapput.
Atisat Nuummut apuunneqarpata Nunatta Katersugaasiviani saqqummersinneqassapput, takusarneqarluarnissaallu siulittuutigineqarpoq, qallunaatsiaammi ukiuni akullerni qanoq atukkersortarsimanersut takorusunnaqaaq.
Qallunaatsiaat atisaasa taamanersuarnisat Kalaallit Nunaannut aatsaat nassiunneqarnerinut pissutaavoq itsarsuarnitsat paarilluarnissaannut piumasaqaatit sakkortoorujussuummata.