Tasiilarmiut nipaat: Atisanik, naatitanik arnanullu tunngasunik nioqqutissanik amigaateqartut

KNR-ip Tasiilami nioqqutissakippallaarnera septembarip naanerani allaaseraa.

Najugaqartullu ukiup ingerlanerani pilersuinerup qanoq innera maanna oqaluttuaraat.

Arlallit naatitanik atisanillu nioqquteqarnerup tungaatigut kinguariartoqarsimanera uani oqaatigaat.

Oktavia Maqep Tasiilami Pilersuisoq ukiut ingerlanerini nioqqutissakilligaluttuinnarnerarpaa: - Aatsaat massakkut taamak nungutsigipput umiarsuup angalaruttornerata nalaani, taanna oqarpoq. Assi © : Aviâja Kilime / KNR

Attaveqaasersuutinut naalakkersuisup Iddimanngiiu Jensen Biancop (IA), Pilersuisup Tunumi sullissinerulernissaata pilersaarutaannginnera Lars Poulsenimut (S) akissuteqarnermini, aggustimi paasissutissiissutigaa.

Tamanna KNI-p pilersuisussaatitaanissamik kiffartuussinissamut isumaqatigiissuteqareernera pissutaavoq. Tasiilami pisiniarfik niuernermi piumasaqaatit naapertorlugit ingerlanneqarmat, kiffartuussinissamut isumaqatigiissut aqqutigalugu tapiissuteqartoqassanngilaq.

KNR-ip Tasiilami innuttaasut arlallit, pilersuinermut tunngatillugu qanoq nalaataqarnersut, aqqusinermi apersorpai.  

Atisanik amigaateqarneq

KNR-ip oqaloqatigisaasa amerlanersaasa naatitaqarpiartannginnerata ajornartorsiutaanerujussua pillugu oqaatigaat.

Atisat amigaataasarnerat kingorna eqqaaneqarpoq. Tamanna Karen Ignatiussenip maluginiarsimavaa. 

- Nammineq ukiumut isumannaareertalernikuuvugut, iluatigut qaavatigullu atisanik naammattunik allatsitsilluta, taanna oqarpoq.  

- Taava qamani akisullutillu aserujapput amerlanerit. Pisisarunnaarnikuuvugut Pilersuisumi Tasiilami. Allatsitsisarfik SHEIN (atisanik allatsitsisarfik, aaqq.) taanna iluaqutaaqaaq. 

Oktavia Maqep Pilersuisumi atisanik aamma nioqquteqarpiartannginnerarpaa. 

- Ippassaani tappikunga misissuiartoraluarpunga, soorlu inuusuttuaqqanut apersortittussanulluunniit, amigaateqarujussuarput, taanna oqarpoq.  

- Soorlu juullikkunni piniarsarisat ajornakusooqaat, allatsitsinngikkutta nammineq maani taava pissaqanngilagut.

Nioqqutissat nungussimasut

Karen Ignatiussenip meeraaqqanut arnanullu nioqquteqarpiartannginnera oqaluttuaraa. 

- Ukiumut naammattunik piserusuttaraluarluni amigartitsiuarnerit erloqinartarput, ingerlaannaq pisiarisinnaanagit, taanna oqarpoq.  

- Apersuigaanni aallertoqariarluni quersuarmut, amerlanertigut kingorna oqartarput: “nungussimapput tamarmik nungussimapput”.

Karen Ignatiussenip atisanik, naatitanik meeraaqqanullu aamma arnanut nioqqutissaqarpiartannginnerarpaa.  Assi © : Aviâja Kilime / KNR

Karen Ignatiussenip naatitanik, atisanik nioqqutissanillu allanik amigaateqartarnera nukillalaarutigaa.

- Ernumanartoqartutut misiginartarpoq nioqqutissat ikiliartortut, kinguariartortutut malunnarpoq, Inatsisartut Tasiilaq eqqaakulanngimmassuk.  

- Meeqqakka kinguaassakkalu pillugit neriuppunga arlaatigut iliuuseqartoqassasoq. 

KNR-ip tusagassiortuisa ilaasa oktobarip qeqqata missaani Tasiilamiinneranni, Pilersuisumi naatitaqarluarpoq. Naatitalli ajortigajalersut soorlu iipilit assimiittut aamma nioqqutigineqarput.  Assi © : Markus Valentin / KNR

Naammagittaalliuutit

Saalu Mathiassenip pingaartumik ukioq manna piffissap ingerlanerani nioqqutissakilliartornerarpaa. 

- Umiarsuup tikinneraninngaanniit massakkumut suli amigaateqartorujussuuvoq maluginiakkannik, taanna oqarpoq. 

Naatitat ajortereersut nioqqutaalertarnerat pakatsissutigisaqaa. 

- Naatitat asiunikut oqaannaraanni igitassaannaat, soorunami Navarana aamma taanna qujanartumik tikisitsisarpoq. Pilersuisoq amigaateqartorujussuuvoq ukioq manna.

Saalu Mathiassenip Tasiilami pilersuinerup tungaatigut ukiup ingerlanerani siuariartoqarsimannginnerarpaa.  Assi © : Aviâja Kilime / KNR

Saalu Mathiassenip Tasiilarmiut arlallit Pilersuisumut naammagittaalliuuteqarsimanerarpai. 

- Soorunami allakkat qamani nakkartitsivimmut ilineqartarput suut amigaatigineqarpat suut naammagittaalliuutigineqartarpat? Allagaqaatit taakku tunniunneqartarput ingammik Pilersuisumut. 

- Innuttaasuulluta Tasiilami taakku tunniuttuaannarpagut amigaatit allallu pilersuisumut allagaqaatigalugit, allanngortoqassananili. Ukioq manna allanngortoqanngilaq.

KNR Tasiilami Pilersuisumi sulisut apersorneqarnerat pillugu piffissami aggersumi allaaserisaqassaaq. 

KNI isornartorsiuinermut akissuteqarpoq

KNI-p nioqqutissat assigiinngitsut neqeroorutigineqartut pisiniartartut pisariaqartitaat kissaatigisaallu naapertorlugit ingerlaavartumik nalilersorneqartarnerat KNR-imut allakkatigut akissuteqarnermini paasissutissiissutigaa. 

- Nioqqutissat taagorneqartut pillugit isornartorsiuineq paasilluarparput. Taamaattumik innuttaasut taakkartugaat misissorpagut, KNI allappoq. 

- Nioqqutissat taakku umiarsuarmik sapaatip akunnerata tulliani tikiunneqassapput. 

KNR-ip KNI-mit ersarinnerusumik akissuteqarnera Tasiilamilu Pilersuisumi sulisut apersorneqarnerat piffissami aggersumi allaaserissavaa.