Atassutip inuusuttaasa partiimi siuttut tamaasa tunuaqquaat

Atassutip Inuusuttaasa siulittaasuat partiillu siulersuisuunerini ilaasortaq, Hans Lyberth, isumaqarpoq, siulersuisut tamarmik tunuartariaqartut immikkullu ittumik ataatsimeersuarnermi nutaarluinnarnik siulersuisoqalertariaqartoq:

- Massakkut aqqutissatut siullertut isigilernikuuarput, siulersuisuunerni issiasut tunuartariaqartut, Hans Lyberth oqarpoq.

Atassutip immikkut ittumik ataatsimeersuarnissaani, Sisimiuni aggustip 28-ani 29-anilu pisussami, Finn Karlsenip siulittaasutut juunip 16-ani tunuartup taartissaanik qinersinissaq kisimi siunertaavoq. Kisianni Atassutip Inuusuttai isumaqarput, tamanna naammanngitsoq, eqqissiviilliornerlu anigorniarlugu siulersuisut tamarmik taarserneqartariaqartut.

- Isumaqarpugut, assersuutigalugu qinersinerup kingulliup kingiorna kinguariarnitsinnut suut pissutaasimasinnaanersut eqqartorneqartariaqartut. Suut kukkussutigisimasinnaanerigut suullu pitsanngorsarneqarsinnaanersut misissorneqartariaqarput, Hans Lyberth oqarpoq.

Suli qinersisoqanngitsorli Atassutip qinersisaasa partii saqqumilaannginnerarlugu isornartorsiortarpaat, tamannalu Hans Lyberthip isumaqatigaa. Isumaqanngilarli Atassutip politikkia soqutigineerukkiartortoq.

- Uanga taamannak oqarusunngilanga, misigisimasarama Atassutip anguniagai soqutiginartuusut, aammalu ukiuni kingullerni kusanartorpassuarnik angusaqartoq, Atassutip inuusuttaaasa siulittasuat oqarpoq.

Jensine Berthelsen Radioaviisimut ippassaq oqarpoq, Atassutip siulersuisui suleqatigiissinnaanatillu ataqatigiissinnaanngitsut. Hans Lyberthip aamma taama isumaqarpoq.

- Siulersuisuunerni ataatsimeeqataasalerattali uangattaaq misigisimavunga, isumaqatigiissinnaanngitsoqartoq. isumaqatigiinngissutit assigiinngitsuupput, anguniakkanut tunngasut ilaatigullu inuttut sammivallaarnersuaq, Hans Lyberth oqarpoq.

Sisimiuni immikkoortortaqarfik immikkut ittumik ataatsimeersuarnissamik aamma piumasaqalerpoq.

- Qinersinerup kingunera eqqarsaatigalugu Atassutip iluani nutarterinissaq pisariaqarpoq, immikkoortortaqarfimmiit allapput. Atassut annertuumik suliassaqarpoq, partiip annertusaqqinnissaa eqqarsaatigalugu. Siulittaasoq kisimi pisuutiinnarneqarsinnaanngilaq aamma siulersuisut tamarmik immikkoortortaqarfiillu eqeersimaarnerusariaqarput, Atassutip Sisimiuni immikkoortoqarfianiit allapput.