Atassut Upernavik: Qaleralinnik tunisinerup unitsinneqarnera nalilersoqqinneqarli

Upernaviup kujataani nunaqarfinni, Nuussuarmi Upernavik Kujallermilu qaleralinnik tunisinerup unitsinneqarnerinik aalajangerneq, Upernavik Seafoodip siulersuisuisa nalilersoqqittariaqaraat, Upernavimmi Atassutip immikkoortortaanit piumasarineqarpoq.
Allattoq Apollo Jeremiassen
januaarip 15-at 2014 06:03

Nunaqarfinni pineqartuni qaleralinnik tunisineq januaarip aallaqqaataannit atuutilersumik matuneqarallarpoq, tunisinerlu aatsaat marsip qeqqata missaani ammaqqissasoq aalajangiunneqarluni.

Tunisassiornerup upernaaru ataavartumik pisinnaanissaa anguniarlugu tunisineq matuneqarallartoq Upernavik Seafoodip tunngavilersuutigaa.

Piffissami taaneqartumi qaleralinnik tunisisinnaajunnaarnermi aalisartut 62-it aningaasarsiornissaraluat eqqorneqarpoq, taakkulu taperserlugit Upernaviup eqqaani nunaqarfinni aqutsisut matusinermut uparuaapput.

Qaleralinnik tunisassiorfiit ammaqqinneqarnissaat qanittukkut pissasoq, Upernavimmi Atassutip immikkoortortaata piumasaraa, taamaalilluni aalisartut aningaasarsiuleqqissinnaassammata aamma akiligassaminnik akilersueqqilersinnaaniassammata.

Qaasuitsup Kommuniani isumaginnernermut ataatsimititaliap siulittaasuata, Jess Svanep ippassaq oqaatigaa, qaleralinnik tunisinerup unitsinneqarallarnerani, Upernaviup eqqaani aalisartut ikiorserneqarsinnaasut, matumanili piumasaqaataasoq aalisartut sullivinni sulisinnaanissaminnut piareersimassasut.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq