Atassut: Siunnersuut aningaasarsiupallanniarneruvoq
Atassut sinnerlugu naalakkersuisunut allakkami qulingiluanik quppernilimmi Atassutip siulittaasua Gerhardt Petersen Atassutillu gruppiani siulittaasoq Finn Karlsen atsiortuupput.
Siunnersuut inuppalaassuseqanngilluinnartumik aammalu nammaqatigiikkusussuseqanngilluinnartumik pingaartumillu nunaqarfiit avinngarusimasunilu najugaqartut aammalu aalisarnermik piniarnermillu inuussutissarsiuteqartut annertoorujussuarmik ajorseriaataasumik eqqugaaffigisassaannik naalakkersuisut siunnersuuteqarnerarlugit Atassut allagaqarpoq. Naalakkersuisut naalakkersuisoqataasullu Atassummit kaammartorneqarput silatusaartumik peqqissaartumillu suliaq ingerlanneqaqqullugu aammalu illuatungiliuttut peqatigalugit aningaasarsiornikkut ingerlatsineq attanneqarsinnaasoq patajaatsorlu nassaariniaqqullugu, Naalakkersuisummi aningaasanut siunnersuutaanni iliuuseriniakkat nutaat amerlanersaat attanneqarsinnaanngimmata Atassut naalakkersuisunut taamatut allaqarpoq.
Nunaqarfiit pillugit sipaarniuteqarnissamik naalakkersuisut siunniussaqarnerat Atassummit unitsinniarneqarpoq, nunaqarfinni inuussutissarsiutitigut ineriartortitsinissamillu misissuinerit naamassineqarnissaasa tungaanut.
Nunarput taamak isorartutigisoq aammalu innuttaasut taamak ikitsigitsillugit siammarluni najugaqarneq immini pisuussutaasoq annertoorujussuuvoq, Atassut allappoq nangillunilu, Nunarsuarmi avatangiisitsinnut ersersitsivoq nunarput tamaat atoripput aammalu nunarput tamaat nunagisatsitut illersoripput.
Naalakkersuisut aalisarnermi politikkiat kukkusuunerarlugu akuersaarnaanagulu Atassut allagaqarpoq.
Naalakkersuisunut sakkortuumik kaammattuutigivaat inuussutissarsiummik ingerlataqartunut oqaloqatiginninneq aallartinneqareersoq nanginneqaqqullugu, oqaloqatigiinnerullu ingerlanneqarnerani raajanut akitsuutit qaffanneqarnissaannik, aalisagartassiinermi akitsuuteqartitsinissamik eqqussiniarneq aalisarnermut akuersissutit nakkutigineqarnerannut akiliisitsisalerniarneq Naalakkersuisut eqqunniagaat unitsinneqarallassasut, Atassutip siulittaasua Gerhardt Petersen aamma Finn Karlsen naalakkersuisunut allaqarnerminni taamatut allapput.
Aningaasanut inatsisissatut siunnersuummi Atassut allagaqarnermini ajunngitsunik siunnersuuteqanngilaq. Kommuuninut tapiissutinik sipaaruteqartoqarnissaq itigartippat, ilaatigut kommuninik aqutsineq kisermaassilluni aqutsinertut taallugu. Ineqarneq pillugu sinnersuutitut saqqummiussaq akuersaanngilaat, Nukissiorfiillu piginneqatigiiffittut ingerlanneqalernissaa anguniarlugu, Atassut sinnerlugu siulittaasoq Gerhardt Petersen aammalu Atassutip gruppeani siulittaasoq Finn Karslen naalakkersuisunut ilaatigut taamatut allagaqarput.
