Atassut: Naartuersinneq avillugu akisussaafigineqartariaqarpoq

Naartuersittartut amerlavallaarnerat inuiaqatigiinnullu akisuallaarnerat pissutigalugu Malik Berthelsen taama siunnersuuteqarpoq. Malik Berthelsenili Atassummiit maanna illuatungilerneqarpoq. Naartuersittarnermut inatsisip sukannernerulersinneqarnissaanut siunnersuummini Malik Berthelsen ilaatigut ima oqarpoq:

- Aqqusinikkut angallannermi sukaterisoqarneratigut biilertartut qitequtaasaqartalerput, qitequtaasaq inuppassuarnit ajutoorsinnaanermut illersuutitut atornagu, kisianni akiliisitaanissartik pinngitsoortinniarlugu taamaaliortarput, Malik Berthelsen ilaatigut allappoq, piaarinaatsoorlutillu naartulersoortartut akiliisitaanissaq pinngitsoortinniarlugu mianersornerulernissaat ilimagalugu.

Tamannali Atassutip Sisimiuni immikkoortortaqarfianit illuatungilerneqarpoq:

- Inuk kinalunniit biilinut assersuunneqarsinnaanngilaq, aamma naartuersittarneq eqqaarsaatigalugu illuatungiinnarsiortutut isigaarput, arnarmi kisimi pillaatissinniarneqartutut taakkartorneqarpoq. Taamatut akiliisitsisarneq ingerlanneqalissappat angutip akilertariaqaraa isumaqarpugut, pisuussut inunni marlunniimmat, tamarmillu akisussaaffigisariaqarpaat, Atassut Sisimiut allappoq.