Atassut ikummatissanut akitsuuseerusunngilaq

Aningaasanut inatsit 2010 akuerineqalermat, Naalakkersuisut takusinnaavaat, 2011-miit ukiut tulliuttuni 105 millioni koruuninik amigaateqartassallutik.

Naalakkersuisut taamaammat nutaanik isertitassarsiorput; Avatangiisinut akitsuutit. Taakkununngalu ikummatissanut akitsuut liiterimut 25 øriusoq ilaalluni.

Atassulli tassunga ilaarusunngilaq. Umiatsiaararsortut ikummatissanik angisuumik atuisuupput.

- Ulluinnarni aningaasartuutaat soorunami qaffassapput. Taassumalu malitsigisaanik kalaalimernit, ullumikkut aallunneqaqisut, aamma akitsussapput, partiip siulittaasua Gerhardt Petersen oqarpoq.

Naalakkersuisut aamma siunnersuutigaat, Nunatsinnut tikinnermi akitsuuteqanngitsunik eqqussisarneq unissasoq. Atassutilli tassuuna isertitassat amerlanissaat ilimaginngilaa. Taarsiullugu Namminersorlutik Oqartussani sipaarnissaq aammalu inuulluarniutaanerusunik akitsuusiinissaq kissaatigineruaa:

- Soorlu akitsuuserneqartut biiliusinnaapput. Taavalu aamma allaffissorneq, ukiorpassuarni oqaluuserineqartoq, sipaarutaasinnaavoq, partiip siulittaasua oqarpoq.