Atassut: Aleqap peqquserluuteqarsimanini oqaluttuarisimasariaqaraluarpaa

Transparency Greenlandip suliamut atatillugu arfininngormat isornartorsiuinerata kingorna Gerhardt Petersen taama oqarpoq:

- Soorunami uanga tusarusunnerusimassagaluarpara taamanikkut suleqatigileratsigu taakku oqaatigisimanissai, kisianni taamaassimanngilaq. Immaqa qangarsuarli pisimasuummata taavalu aamma immaqa saqqummiukkusussimanagit, Atassutip siulittaasua Gerhardt Petersen oqarpoq.

Aleqa Hammondip 5100 koruunit nalingannut peqquserluuteqarsimanermik isertuussisimanera Transparency Greenlandip ilungersunartutut nalilerpaa. Aleqa Hammond Dankorti atorlugu aningaasat taakku 90-ikkut qiteqqunneranni atorsimavai, naak korti taanna Grønlandsbankenimit matuneqarsimagaluartoq.

Aleqa Hammnd Greenland Tourismimi taamanikkut 1995-imi sulivoq, peqquserluuteqarsimaninilu eqqartuussinermi taamanikkut nassuerutigalugu. Naallu suliaq pisoqanngoreeersimagaluartoq Naalakkersuisut siulittaasuat ammanerusimasinnaagaluartoq, Atassut isumaqarpoq, suliarli Naalakkersuisut siulittaasuannut kinguneqartariaqanngitsoq aamma oqaatigalugu:

- Suliaq Aleqa Hammondimut kinguneqartariaqanngitsoq isumaqarpugut, tassa Aleqa Hammond Naalakkersuisut siulittaasuattut tapersersorparput, Gerhardt Petersen oqarpoq.

Aleqa Hammondip 90-ikkunni pisimasoq pillugu Facebookikkut ammasumik allagaqarsimanera, naalakkersuisoqatigisimasami Partii Inuit siulittaasuata Nikku Olsenip maluginiarsimavaa, kukkussutini ajuusaarutigigaa maluginiarsimallugu.

- Maluginiarpaa Facebookikkut aamma inuttut nalunaaruteqartoq, kukkussutini ajuusaarutigigaa. Tusaatissatut aamma pingaarutilittut tiguarput, Partii Inuit siulittaasuat Nikku Olsen oqarpoq, suliarlu Naalakkersuisut siulittaasuannut kinguneqassanersoq aperigatsigu ima akilluni:

- Uanga eqqartuussisuunngilanga. Eqqartuussisut tassaapput qinersisartut immaqaluunniit eqqartuussivik, taava taakkua aperisariaqassavatit, Partii Inuit siulittaasuat Nikku Olsen oqarpoq.

Aleqa Hammondip peqquserluttuliorsimaneranut atatillugu ileqqorissaarnermik innarliisoqarsimanersoq qinersisartut namminneq aalajangissagaat, Demokraatit siulittaasuata Jens B. Frederiksenip oqaatigaa.

Naak Aleqa Hammond politiinut siornatigut tunniunneqarsimagaluarluni Inatsisartunut qinigaasinnaasutut upernaaq nalilerneqarnikuusoq, Jens B. Frederiksenip eqqaasitsissutigaa. Demokraatit siulittaasuata tamanna pingaartippaa, suliarli qanganitsereermat Demokraatit Naalakkersuisunik suleqateqarnerannut ajornartorsiutaanngitsoq aamma oqaatigaa.