Atassut: Aalisarnermut inatsisip oqaluuserineqarnissaa kinguartinneqartariaqarpoq
Sinerissap qanittuani aalisartut, avataasiortullu oqaloqatigereerlugillu Atassut taama nalunaaruteqarpoq:
- Nutartinnissaa, pipallattumik suliarinissaa isumaqatiginngilarput. Aamma naluneqanngitsutuut aalisarnermi susassaqartut upernaamut ataatsimeersuartussaapput, tassanilu saqqummiussat soorunami tusaqqaarusupparput, Atassutip siulittaasua Gerhardt Petersen oqarpoq.
Aalisartut aalisassapput, tunisassiortullu tunisassiussallutik. Naalakkersuisut siulittaasuata Aleqa Hammondip, Inatsisartut ukiakkut ataatsimiinnissaasa ammaanersiorneqarnerani, ukiortaamilu oqalugiaammini tamanna ilaatigut oqariartuutigaa.
Nunattali aningaasarsiorneranut tamanna ajoqutaaginnassasoq, suliffissaaleqisullu amerleriaannassasut, siunnersuummut taassumunnga isornartorsiuisut oqarput. Tassa Inuit Ataqatigiit aamma Kalaallit Nunaanni Sulisitsisut Peqatigiiffiat, GA.
- Maannakkut ilaatigut pioreersuni aalisartut tunisassiorfinnik ilaatigut piginneqataareerput. Taanna iluatigaarput, taamaalillutik tunisassiorfiit aamma pilersorsinnaanerat taamaattoq soqutigilluinnartarmassuk, Gerhardt Petersen oqarpoq.
Atassutip sinerissap qanittuani aalisartut, avataasiortullu ataatsimeeqatigereerlugit, Naalakkersuisut aalisarnermut inatsimmut allannguutissatut siunnersuutaasa kinguartinneqarnissaat piumasaraat, Naalakkersuisoqatigiinnillu tusaaniarneqarnissartik naatsorsuutigaat:
- Naatsorsuutigilluinnarpara Naalakkersuisooqataagatta, taavalu aamma maannakkut aalisarnermut naalakkersuisoq nutaaq januaarip 27-ani aatsaat ivertinneqartussaavoq, taannalu isumaqarpunga iserfigilluassaguniuk, suliarilluassaguniullu isumaqarluinnarpugut Atassutip tungaaninngaanniit kinguartinneqassasoq taanna, naatsorsuutigaarpullu tusaaniarneqassasoq, Atassutip siulittaasua Gerhardt Petersen oqarpoq.
Naalakkersuisut aalisarnermut inatsimmut allannguutissatut siunnersuutaasa susassaqartunut tusarniaassutigineqarnerat ukioq manna januaarip arfernanni naammassivoq, pilersaarutillu malinneqassappata allannguutissatut siunnersuutit Inatsisartut upernaaru ataatsimiinnissaanni oqaluuserineqassallutik.
