Ataqqinartorsuaq Dronning Margrethe ullumi 75-iliivoq
Dronningilli inuuissiornera pisortatigoortumik ippassaq unnukkulli nalliussineqarpoq, persuarsiutigineqartumik Christiansborgimi ippassaq unnukkut nerersuaqatigiittoqarmat. Kunngikkormiut qinikkallu dronningimit qaaqquneqartut nerersuaqatigiipput.
Ministeriuneq Helle Thorning-Schmidt, Danmarkimi naalakkersuisut sinnerlugit oqalugiarpoq:
- Pisut ullutsinni ilaatigut sukkasaqaat. Nunarsuarmilu allanngoriartornerit eqqarsaatigalugit aalajangersimasumik uniffigisinnaasassatsinnik peqarsinnaasariaqannginnerpugut? Uanga taama isumaqarpunga, Illillu tassunga atatillugu atorfissaqartippatsigit, Helle Thorning-Schmidt ilaatigut oqarpoq.
Prins Henrik nalliuttorsiormermut peqataassanngilaq
Prins Henriup nuallulluni napparsimanera pissutaalluni nalliuttorsiornermut ippassaq peqaanngilaq.
Dronningili karetinut ilaalluni Københavnip aqqsuernini ullumi ingerlaaleruni kisimiinnavianngilaq. Kunngissakkummi karetimut aamma ilaassapput.
Karetimik ingerlaarneq Amalienborgimi Christian VII's Palæmit Danmarkimi nalunaaqutaq ataatsimut qiteqquttoq aallartissaaq, Københavnillu Rådhusiata tungaanut ingerlaartoqassalluni.
Kunngikkormiut avammut tusagassiisartuata Lene Ballebyp tamanna ippassaq uppernarsarpaa.
Dronningi Christian VII's Palæp balkonianit Danmarkimi ulloqeqqanut takuneqarsinnaassaaq, innuttaasut tassani ilassissagamigit.
Pisussarpassuit
Dronningip inuuissiorneranut atatillugu Københavnip Rådhusiani aliikkusersuinerit assigiinngitsut pilersaarutaapput. Jazzimik nipilersortaqassaaq, agiar(tar)tut tusarnaartitsissapput, Københavns Kommunes Skoleorkesterilu aamma tusarnaartitsissalluni. Isiginnaartitsisarfiillu qitinnermik immikkut aallutallit marluk aamma isiginnaartitsiumaarput.
Dronningi ilaqutaalu Københavnip Rådhusiata balkonianit Danmarkimi ualikkut nalunaaqutaq marlunngorpat taava tamanit takuneqarsinnaajumaarpoq, Fredensborg Slotimilu unnukkut nereqatigiittoqarumaarluni.
Ataqqinartorsuaq Dronning Margrethe Aappaata 75-iliinera Nunatsinni aamma malunnartinniarneqarumaarpoq, tassa nuna tamakkerlugu erfalasulertoqassaaq, Nuutoqqamilu ilaatigut qamutilittartoqassalluni, assigiinngitsunillu pisoqassalluni. Nuummiut ulloqeqqanut tanneq aqqarnermut pisunut malinnaajartorsinnaassapput.
